މިއީ ދިވެހި ހައްޖުވެރީންނަށް އެންމެ ލުއި، އަދި އެންމެ އިންތިޒާމު ރަނގަޅު ހައްޖު މޫސުމަށް ވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އެކްސްގައި ދެންމެ ކުރެއްވި ޕޯސްޓެއްގައި ވިދާޅުވީ މައްކާ ރޫޓް އިނީޝިއޭޓިވްގައި ބައިވެރިވުމުގެ ފުރުސަތު މިހާތަނަށް ލިބުނު 8 ގައުމުގެ ތެރޭގައި ރާއްޖެ ހިމެނުމަކީ ވަރަށް ބޮޑު އުފަލެއް އަދި ޝަރަފެއް ކަމަށެވެ.
Advertisement
ރާއްޖެއިން މި އަހަރު ހައްޖަށް ދިޔަ ފުރަތަމަ 235 ހައްޖުވެރީންނަށް ސައުދި އަރަބިއްޔާގެ ސަރުކާރުން ވަރަށް ހޫނު މަރުހަބާއަކާއި އެކު، ވަރަށް ފުރިހަމަ މެހެމާންދާރީއެއް އަދާކުރައްވާފައިވާ ކަމަށް ރައީސް ވިދާޅުވި އެވެ.
"ހައްޖުވެރީން އެއާޕޯޓުގައި ގިނަ ވަގުތު މަޑުކުރަން ނުޖެހި، ދަތުރު ފޮށި ތަންމަތި އަމިއްލައަށް އުފުލަން ނުޖެހި، ބޮޑެތި ލުއިތަކެއް ވަނީ ލިބިފައި،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި، އިރާދަކުރެއްވިއްޔާ މި ފަހަރުގެ މުޅި ހައްޖު ދަތުރު ވެސް ދިވެހި ހައްޖާޖީންނަށް މިފަދަ އެތައް ލުޔެއް ލިބި، ހިދުމަތުގެ ފެންވަރު ވެސް ރަނގަޅު ވާނެ އެވެ. އަދި ދިވެހި ހައްޖުވެރީންނަށް އެންމެ ލުއި، އެންމެ އިންތިޒާމު ރަނގަޅު ހައްޖު މޫސުމަށް ވާނެ އެވެ.
އުންމީދަކީ ކުރިމަގުގައި މިއަށް ވުރެ ވެސް ކަންކަން ފަހިވުން ކަމަށް ރައީސް ވިދާޅުވި އެވެ.
"ދިވެހި ހައްޖުވެރީންނަށް ވަރަށް ބޮޑެތި ފަސޭހަތަކެއް މި އަހަރު ހޯދައިދެވޭތީ މާތްﷲގެ ޙަޟްރަތަށް ހަމްދުކުރަން. އަދި ސައުދީ ސަރުކާރަށް ޝުކުރު ދަންނަވަން،" ރައީސް ވިދާޅުވި އެވެ.
"ރައީސް ވަނީ ހިތްހަމަޖެހުމާއި ދުޅަހެޔޮކަމާ އެކު، މަބްރޫރު ހައްޖެއް ދިވެހި ހައްޖުވެރީންނަށް މާތްﷲ މިންވަރު ކުރައްވާށި. އާމީން،"
ރާއްޖެއިން މި އަހަރު ހައްޖަށްދާ މީހުން އިއްޔެ ވަނީ ފުރަން ފަށައިފަ އެވެ. ހައްޖުވެރިންގެ ދެވަނަ ގްރޫޕް ފުރީ މިއަދެވެ.
މި އަހަރު ރާއްޖެއިން 1،000 މީހަކު ހައްޖަށް ދެ އެވެ.
ސަރުކާރުން މިފަހަރު ހައްޖުވެރިންނަށް ވަނީ ލުއިފަސޭހަ އެތައް އިންތިޒާމެއް ހަމަޖައްސައިދީފަ އެވެ. މައްކާ ރޫޓް އިނީޝިއޭޓީވް ތައާރަފުކޮށް ދަތުރުފަތުރުގެ ބޮޑެތި ލުއިތަކެއް ހަމަޖައްސައި ދީފައިވެ އެވެ. އަދި ހައްޖުވެރިންގެ ބީއެމްއެލް ކާޑުގެ ޑޮލަރު ލިމިޓް ވެސް 2،000 ޑޮލަރާ ހަމައަށް ބޮޑުކޮށްދީފައިވެ އެވެ.
