ހުޅުމާލެ ހޮސްޕިޓަލުގެ ޚިދުމަތްތައް ފުޅާކޮށް، އިތުރަށް ތަރައްޤީކުރުމުގެ ގޮތުން ކުރިޔަށް އޮތް ތަނުގައި ހުޅުމާލެ ހޮސްޕިޓަލުގެ ގޯތިތެރޭގައި 250 އެނދުގެ ހޮސްޕިޓަލެއް ތަރައްޤީކުރުމަށް ޕްލޭންކުރަމުންދާ ކަމަށް މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް ވިދާޅުވެއްޖެއެވެ.

މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެމްގެވުމާއެކު ކުރިޔަށް ގެންދާ ދުރުރާސްތާ ޕްލޭނެއް ކަމަށް ސީއީއޯ ވިދާޅުވިއެވެ.

ހުޅުމާލެ ހޮސްޕިޓަލުގައި އަލަށް ތަރައްޤީކުރި 14 އެނދުގެ އިމަރޖެންސީ ރޫމް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ސީއީއޯ ވިދާޅުވީ، ހުޅުމާލެ ހޮސްޕިޓަލުގެ އެނދުގެ ދަތިކަން ހައްލުކުރުމަށްޓަކައި 28 އެނދުގެ ވޯޑެއް ޤާއިމްކުރުމަށް ވެސް ޕްލޭންކޮށްފައިވާ ކަމަށާއި، މެންޓަލް ހެލްތް ސެންޓަރެއް ޤާއިމްކުރުމުގެ މަސައްކަތް ވެސް މިއަހަރު ފެށުމަށް ހަމަޖެހިފައިވާ ކަމަށެވެ.

އަދި ހުޅުމާލެ ހޮސްޕިޓަލުގައި ތަރައްޤީކުރަމުން އަންނަ 30 އެނދުގެ ޑަޔަލިސިސް ސެންޓަރު މިއަހަރުގެ މިނިވަން ދުވަހާއި ދިމާކޮށް ހުޅުވުމަށް ނިންމާފައިވާ ކަމަށްވެސް އިބްރާހިމް ޢަބްދުއްރައްޒާޤު ޙަލީމް ހާމަކުރެއްވިއެވެ. މިހާރުވެސް ހުޅުމާލެ ހޮސްޕިޓަލުގެ ޑަޔަލިސިސް ސެންޓަރުގައި 10 އެނދު ޤާއިމްކުރެވިފައިވާއިރު، 80 އަށްވުރެ ގިނަ މީހުންނަށް ޚިދުމަތް ދެމުންދެއެވެ.

މިދިޔަ އަހަރުގެ ނޮވެންބަރު މަހު ހުޅުމާލެ ހޮސްޕިޓަލް ވަނީ ޓަރޝަރީ ހޮސްޕިޓަލް ފެންވަރަށް ބަދަލުކޮށްފައެވެ. މި ބަދަލާއެކު، ގިނަ އިތުރު ޚިދުމަތްތަކެއް ވަނީ އެ ހޮސްޕިޓަލުގައި ޤާއިމްކުރެވިފައެވެ. މީގެ ތެރޭގައި ޒަމާނީ ވަސީލަތްތަކާއެކު 4 އޮޕަރޭޝަން ތިއޭޓަރު ހިމެނޭ ކޮމްޕްލެކްސް އަކާއި، 10 އެނދުގެ އިންޓެންސިވް ކެއަރ ޔުނިޓު (އައިސީޔޫ)، އަދި ނިއޮނޭޓަލް އިންޓެންސިވް ކެއަރ ޔުނިޓެއް ހިމެނެއެވެ.

މި ހުރިހާ ތަރައްޤީތަކާއެކު، ހުޅުމާލެ ހޮސްޕިޓަލުން ދެވޭ ޚިދުމަތްތަކުގެ ފެންވަރު އިތުރަށް ރަނގަޅުވެ، ހުޅުމާލޭގައި ދިރިއުޅޭ ރައްޔިތުންނަށް ފަސޭހަކަމާއެކު ޞިއްޙީ ޚިދުމަތް ލިބިގެންދާނެއެވެ. ޚާއްޞަކޮށް 250 އެނދުގެ އައު ހޮސްޕިޓަލް ތަރައްޤީވުމުން، ހުޅުމާލޭގެ ޞިއްޙީ ނިޒާމު މުޅީން އައު ހަރުފަތަކަށް އަރައި، ރާއްޖޭގެ ޞިއްޙީ ދާއިރާގައި މުހިންމު ދައުރެއް އަދާކުރާނެއެވެ.

ހުޅުމާލެ ހޮސްޕިޓަލުގެ މި ތަރައްޤީތަކަކީ ރާއްޖޭގެ ޞިއްޙީ ދާއިރާ ހަރުދަނާކޮށް، ރައްޔިތުންނަށް ދެވޭ ޚިދުމަތުގެ ފެންވަރު މަތިކުރުމަށް ސަރުކާރުން ކުރަމުންދާ މަސައްކަތްތަކުގެ މުހިންމު ބައެއްގެ ގޮތުގައި ފާހަގަކުރެވެއެވެ. މި މަސައްކަތްތަކުގެ ސަބަބުން ކުރިއަށް އޮތް ތަނުގައި ހުޅުމާލެ ހޮސްޕިޓަލަކީ ރާއްޖޭގެ އެންމެ އިސް ހޮސްޕިޓަލްތަކުގެ ތެރެއިން ހޮސްޕިޓަލަކަށް ވެގެންދާނެ އެވެ.

މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް ވިދާޅުވީ ކުރިޔަށް އޮތްތަނުގައި ހުޅުމާލޭގައި ޚިދުމަތް ހޯދާ ފަރާތްތަކަށް އައިޖީއެމްއެޗަށް ނުވަތަ އެހެން ހޮސްޕިޓަލްތަކަށް ޚިދުމަތް ހޯދުމަށް ދާންޖެހޭ މިންވަރު މަދުވާނެ ކަމަށެވެ. އަދި ރައީސުލްޖުމްހޫރިއްޔާގެ ޚާއްޞަ އިރުޝާދުގެ ދަށުން އިމަރޖެންސީ ރޫމް ބޮޑުކުރުމުގެ މަސައްކަތް ފަށައި، އިތުރު ޚިދުމަތްތައް ޤާއިމްކުރެވިފައިވާކަން ފާހަގަ ކުތެއްވިއެވެ.

މީގެއިތުރުން، ރައީސުލްޖުމްހޫރިއްޔާގެ އިރުޝާދުގެ ދަށުން ހޮސްޕިޓަލްތައް ވާދަވެރި ގޮތުގައި ހިންގުމުގެ ބަދަލުގައި ގުޅިގެން މަސައްކަތްކުރުމަށް އަމާޒުކުރެވިފައިވާ ކަމަށް އިބްރާހިމް ޢަބްދުއްރައްޒާޤު ޙަލީމް ފާހަގަކުރެއްވިއެވެ. މިގޮތުން، މިހާރު އައިޖީއެމްއެޗްގެ އޮޕަރޭޝަން ޑޮކްޓަރުންނަށް ހުޅުމާލެ ހޮސްޕިޓަލަށް ގޮސް އޮޕަރޭޝަންތައް ކުރެވޭނެ އިންތިޒާމް ހަމަޖެހިފައިވާ ކަމަށް އޭނާ ވިދާޅުވިއެވެ.