ހުޅުމާލެ ހޮސްޕިޓަލުގެ ޑަޔަލިސިސް ސެންޓަރު މިނިވަން ދުވަހަށް ހުޅުވުމަށް ނިންމައިފި

ހުޅުމާލެ ހޮސްޕިޓަލުގެ 30 އެނދުގެ ޑަޔަލިސިސް ސެންޓަރު މިނިވަން ދުވަހަށް ހުޅުވުމަށް ނިންމައިފި ކަމަށް މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް މިއަދު ވިދާޅުވެއްޖެއެވެ.

ހުޅުމާލެ ހޮސްޕިޓަލުގައި އަލަށް ތަރައްޤީކުރި 14 އެނދުގެ އިމަރޖެންސީ ރޫމް ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން އޭނާ ވިދާޅުވީ އެ ހޮސްޕިޓަލުގެ ޑަޔަލިސިސް ސެންޓަރަށް އިތުރު 30 އެނދު އިތުރުކުރުމުގެ މަސައްކަތް ހަވާލުކުރެވުނީ މިއަހަރުގެ ފެބްރުއަރީ މަހުގެ ތެރޭގައި އަމިއްލަ 2 ކުންފުންޏަކާއެވެ. މިހާރު ހުޅުމާލެ ހޮސްޕިޓަލުގެ ޑަޔަލިސިސް ސެންޓަރުގައި 10 އެނދު ޤާއިމްކުރެވިފައިވާއިރު، 80 އަށްވުރެ ގިނަ މީހުންނަށް ޚިދުމަތް ދެމުންދެއެވެ.

އިބްރާހިމް ޢަބްދުއްރައްޒާޤު ޙަލީމް ވިދާޅުވިގޮތުގައި ހުޅުމާލެ ހޮސްޕިޓަލުގެ އެނދުގެ ދަތިކަން ހައްލުކުރުމަށްޓަކައި 28 އެނދުގެ ވޯޑެއް ޤާއިމްކުރުމަށް ޕްލޭންކޮށްފައިވާ ކަމަށާއި، މެންޓަލް ހެލްތް ސެންޓަރެއް ޤާއިމްކުރުމުގެ މަސައްކަތްވެސް މިއަހަރު ފެށުމަށް ހަމަޖެހިފައިވާ ކަމަށް އޭނާ ވިދާޅުވިއެވެ. އަދި ދުރުރާސްތާ ޕްލޭންގެ ދަށުން ރައީސުލްޖުމްހޫރިއްޔާގެ އިސްނެންގެވުމާއެކު ހުޅުމާލެ ހޮސްޕިޓަލުގެ ގޯތިތެރޭގައި 250 އެނދުގެ ހޮސްޕިޓަލެއް ތަރައްޤީކުރުމަށް ޕްލޭންކުރަމުންދާ ކަމަށްވެސް އޭނާ ފާހަގަކުރެއްވިއެވެ.

ހުޅުމާލެ ހޮސްޕިޓަލް ތަރައްޤީކުރުމުގެ މަސައްކަތްތަކުގެ ސަބަބުން، ހުޅުމާލޭގައި ދިރިއުޅޭ ފަރާތްތަކަށް އައިޖީއެމްއެޗް ނުވަތަ އެހެން ހޮސްޕިޓަލްތަކަށް ޚިދުމަތް ހޯދުމަށް ދާންޖެހޭ މިންވަރު މަދުވެފައިވާކަން އިބްރާހިމް ޢަބްދުއްރައްޒާޤު ޙަލީމް ފާހަގަކުރެއްވިއެވެ. އަދި ރައީސުލްޖުމްހޫރިއްޔާގެ ޚާއްޞަ އިރުޝާދުގެ ދަށުން އިމަރޖެންސީ ރޫމް ބޮޑުކުރުމުގެ މަސައްކަތް ފަށައި، އިތުރު ޚިދުމަތްތައް ޤާއިމްކުރެވިފައިވާކަމަށްވެސް އޭނާ ވިދާޅުވިއެވެ.