ރަޝިޔާއާއި ޔުކްރެއިނާއި ދެމެދު އަނެއްކާވެސް ހަނގުރާމައިގެ އަސީރުން ބަދަލުކޮށްފިއެވެ. މި އަސީރުންތައް ބަދަލުކުރީ މި ފަހުން ރަޝިޔާއިން ޔުކްރެއިނަށް ދީފައިވާ ވަރުގަދަ މިސައިލް އަދި ޑްރޯން ޙަމަލާތަކަށް ފަހުގައެވެ.

ރަޝިޔާގެ ދިފާޢީ ވުޒާރާއިން ބުނެފައިވާ ގޮތުގައި، ރަޝިޔާގެ ބެލުމުގެ ދަށުގައި ތިބި ޔުކްރެއިންގެ 307 ހަނގުރާމައިގެ އަސީރުން ވަނީ ޔުކްރެއިނަށް ހަވާލު ކޮށްފައެވެ. އަދި ޔުކްރެއިންގެ ބެލުމުގެ ދަށުގައި ތިބި ރަޝިޔާގެ ގިނަ ޢަދަދެއްގެ ސިފައިން ވެސް ވަނީ މިނިވަން ކޮށްފައެވެ. ޔުކްރެއިނުން ވެސް މިކަން ޔަޤީން ކޮށްދީފައިވެއެވެ.

މިނިވަން ކުރެވުނު ޔުކްރެއިންގެ މީހުންގެ ތެރޭގައި އަސްކަރީ ސިފައިންނާއި، ސްޓޭޓް ބޯޑަރ ގާޑް ސާވިސްގެ އޭޖެންޓުންނާއި، ނެޝަނަލް ގާޑް އޮފް ޔުކްރެއިންގެ މެންބަރުން ހިމެނެއެވެ. ރަޝިޔާގެ ސިފައިން ޤައުމަށް އެނބުރި އައުމުގެ ކުރިން ބެލަރުސްގައި މިހާރު ދަނީ ފަރުވާ ހޯދަމުންނެވެ.

އަސީރުންތައް ބަދަލުކުރުމުގެ ކުރިން މިމަހުގެ 23 ވަނަ ދުވަހު ރަޝިޔާއިން ޔުކްރެއިނަށް ވަރުގަދަ މިސައިލް އަދި ޑްރޯން ޙަމަލާތަކެއް ދީފައިވެއެވެ. މި ޙަމަލާތަކުގައި ޔުކްރެއިންގެ ވެރިރަށް ކީޔީވްގެ ހަ ޑިސްޓްރިކްޓަކަށް ޙަމަލާ ދީފައިވާ ކަމަށް ޔުކްރެއިންގެ ސަރުކާރުން މަޢުލޫމާތު ދީފައިވެއެވެ. މި ޙަމަލާތަކުގައި 15 މީހުންނަށް ޒަޚަމްވެ، ގިނަ ޢަދަދެއްގެ މީހުން ދިރިއުޅޭ އިމާރާތްތަކަށާއި މޯލްއަކަށް ގެއްލުން ލިބިފައިވެއެވެ.

މި ހަނގުރާމައިގައި ދެ ޤައުމުގެ ދެމެދުގައި އަސީރުން ބަދަލުކުރުން މިހާތަނަށް ހުއްޓުމަކަށް އައިސްފައެއް ނުވެއެވެ. ދެ ފަރާތުން ވެސް ވަނީ ޖުމްލަ 1،000 ޤައިދީން ބަދަލު ކުރުމަށް އެއްބަސްވެފައެވެ. ނަމަވެސް، ދެ ޤައުމުގެ ދެމެދުގައި ޙަމަލާ ބަދަލުކުރުން މިހާތަނަށް ހުއްޓުމަކަށް އައިސްފައެއް ނުވެއެވެ.