ރައީސް ޑރ. މުހައްމަދު މުއިއްޒު ތެލެސީމިއާ ސެންޓަރު ރަސްމީކޮށް މިއަދު ހުޅުއްވައިދެއްވައިފި އެވެ.
މޯލްޑިވިއަން ބްލަޑް ސާވިސަސްގެ ހިދުމަތްތަކާއި ތެލެސީމިއާ އެންޑް އަދަ ހީމޮގްލޮބިނޯޕަތީސް ސެންޓަރު މިހާރު ވަނީ ހުޅުމާލޭގައި ހުންނަ އޮރެންޖް ހިޔާއަށް ބަދަލުކޮށްފަ އެވެ. ރައީސް ޑރ. މުއިއްޒު އެ ސެންޓަރު ރަސްމީކޮށް ހުޅުއްވައިދެއްވީ މިއަދު ހަވީރު އެތަނުގައި ބޭއްވި ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި މޯލްޑިވިއަން ބްލަޑް ސާވިސަސްގެ ހިދުމަތްތަކާއި ތެލެސީމިއާ ސެންޓަރު އިފުތިތާހުކޮށްދެއްވުމަށް ފަހު ރައީސް ވަނީ އެ ސެންޓަރު ބައްލަވާލައްވައިފަ އެވެ. އަދި އެމަނިކުފާނު ވަނީ އެ ސެންޓަރުން ހިދުމަތް ދެއްވާ ބޭފުޅުންނާއި ހިދުމަތް ހޯދާ ބައެއް މީހުންނާއި ބައްދަލުކުރައްވައި، އެ މީހުންގެ ޝުއޫރުތައް އަޑުއައްސަވައިފަ އެވެ.
ތެލަސީމިއާ ޕޭޝަންޓުންނާއި ގުޅޭ ކަންކަން ފުރިހަމަކުރުމަށް މި ސަރުކާރުން އަންނަނީ ހާއްސަ ސަމާލުކަމެއް ދެމުންނެވެ.
މޯލްޑިވިއަން ބްލަޑް ސާވިސަސްގެ ހިދުމަތްތަކާއި ތެލެސީމިއާ ސެންޓަރު އޮރެންޖް ހިޔާއަށް ބަދަލުކުރުމުގެ މަޝްރޫއު މަޑުޖެހިފައި އޮތުމުން އެ މަޝްރޫއަށް ހާއްސަ ސަމާލުކަމެއް ދެއްވައި، އެ މަޝްރޫއު އަވަހަށް ކުރިއަށް ގެންދިއުމަށް ސިފައިންނާއި ހަވާލުކުރެއްވީ ރައީސް ޑރ. މުއިއްޒެވެ.
އެ މަސައްކަތް ސިފައިންނާއި ހަވާލުކުރުމުން ސިފައިން ވަނީ ގާތްގަނޑަކަށް އެއް މަސް ދުވަސްތެރޭ އެ މަސައްކަތް ނިންމާލައިފަ އެވެ.
ސަރުކާރުން ބުނީ ތެލެސީމިއާ ސެންޓަރުގެ ހިދުމަތްތައް އޮރެންޖު ހިޔާއަށް ބަދަލުކުރުމުން ޖާގައިގެ ގޮތުން ތަނަވަސްވެ، ހިދުމަތް ފޯރުކޮށްދިނުމަށް ފަސޭހަތަކެއް ލިބޭނެ ކަމަށެވެ.
އެ ސެންޓަރުގައި ޖެނެރަލް ވޯޑްގެ އިތުރުން އަންހެނުންނަށް ހާއްސަ ވޯޑަކާއި ކުޑަކުދިންނަށް ހާއްސަ ވޯޑެއް ހިމެނެ އެވެ. އަދި ލޭ ރައްކާކުރުމުގެ ކެޕޭސިޓީ 200ލޭ ޕައިންޓްގައި ހުރި ހުރުން މިހާރު ވަނީ އިތުރު ދެ ސްޓޯރޭޖާ އެކު ޖުމްލަ 600 ލޭ ޕައިންޓަށް އިތުރުކޮށްފަ އެވެ. އަދި ފަސް ނަރުހުންނާއި ހަ ލެބް ޓެކްނީޝަނުން އިތުރުކޮށް، ދާއިމީކޮށް ހުރުމަށް ފިޒީޝަނެއް ހަމަޖައްސާފައިވެ އެވެ.
ހަމައެއާއެކު، އިދާރީ ބަޔަށް ވެސް މުވައްޒަފުން އިތުރުކޮށް، ސްޓޯރޭޖް ބެލެހެއްޓުމަށް ވެސް މުވައްޒަފުން ކުރިއަށް ވުރެ އިތުރުކޮށްފައިވެ އެވެ. އިތުރުކުރެވުނު މި މުވައްޒަފުންނާއެކު، ސެންޓަރުން ހިދުމަތް ދިނުމަށް އިތުރު 16 މުވައްޒަފުން ވަނީ ހަމަޖައްސައިފަ އެވެ.
