ހ. މިޓާޒްގޭގައި ހުރި ގުދަނެއްގެ ފުރާޅު މަތިން ވެއްޓުނު ހައްވާ ޔުމްނު ރަޝީދު (21) ގެ މައްސަލައިގައި ތުހުމަތުކުރެވޭ ރައުދު އަހްމަދު ޒިލާލްގެ ބަންދުގެ މުއްދަތު އަނެއްކާވެސް 5 ދުވަހަށް އިތުރުކޮށްފިއެވެ.
މޯލްޑިވްސް ޕޮލިސް ސަރވިސްއިން މިއަދު ހާމަކުރި ގޮތުގައި، އިއްޔެ ބަންދުން ދޫކޮށްލުމަށްފަހު އަލުން ހައްޔަރުކުރެވުނު ރައުދުގެ ބަންދާއިމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، 5 ދުވަހުގެ މުއްދަތަށް ބަންދުކުރުމަށް އަމުރުކޮށްފައިވެއެވެ.
ފުލުހުން ވިދާޅުވި ގޮތުގައި ރައުދު ކުރިން ދޫކޮށްލާފައިވަނީ މައްސަލައާއި ގުޅިގެން ފުރިހަމަކުރަންޖެހޭ އިޖުރާއަތުތަކެއް ހުރުމުގެ ސަބަބުންނެވެ. އަދި އޭނާ ދޫކޮށްލީ ޕްރޮސެކިއުޓަރ ޖެނެރަލްގެ އޮފީހުގެ އިޖުރާއީ ލަފާގެ މަތިން ކަމަށްވެސް ފުލުހުން ވަނީ ހާމަކޮށްފައެވެ.
