މި އަހަރު ރާއްޖެއިން ހައްޖަށްދާ ދިވެހިންނަށް ހާއްސަކޮށްގެން ސައުދީ އަރަބިއްޔާގައި ސިއްހީ ފަރުވާ ދިނުމަށް ކްލިނިކެއް ހެދުމުގެ މަސައްކަތް ފަށާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.
ޝަހީމް ފޭސްބުކްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ހައްޖުވެރިންނަށް ހައްޖު މޫސުމުގައި ހާއްސަ ކްލިނިކެއް ހެދުމަށް ސައުދީ ސަރުކާރުން ދިވެހި ހައްޖު މިޝަނަށް ރަސްމީކޮށް ހުއްދަ ދީފައިވާ ކަމަށެވެ.
އެ ކްލިނިކް ހަދަނީ މައްކާގެ އަބީރު ހޮސްޕިޓަލާ ގުޅިގެން، ހައްޖުވެރިން ތިބޭ ހައްޖު ކޯޕަރޭޝަންގެ ހޮޓަލުގައި ކަމަށް ޝަހީމް ވިދާޅުވި އެވެ.
Advertisement
ޝަހީމް ވިދާޅުވީ ހައްޖު ކޯޕަރޭޝަނުން ވަނީ ސިއްހީ ފުރިހަމަ ނިޒާމެއް އެ ކްލިނިކްގައި ގާއިމުކޮށްފައި ކަމަށެވެ. ބޭސްފަރުވާ އާއި ހޮސްޕިޓަލް ބެޑް ވެސް އެ ކްލިނިކުގައި ހުންނާނެ ކަމަށް އޭނާ ވިދާޅުވި އެވެ.
"މިއީ މިގޮތަށް ސައޫދީ ހޮސްޕިޓަަލަކާއި ގުޅިގެން އަދި ރަސްމީކޮށް ކްލިނިކް ގާއިމްކުރެވިގެންދާ ފުރަތަމަ ފަހަރު،" ޝަހީމް ވިދާޅުވި އެވެ.
މި އަހަރު ރާއްޖެއިން 1،000 މީހުން ހައްޖަށް ދާއިރު، ހައްޖުވެރިން އަންނަ ހޯމަ ދުވަހު ސައުދީއަށް ދިއުމަށް ފުރަން ފަށާނެ އެވެ. މިފަހަރު ދިވެހި ހައްޖުވެރިން ހަތަރު ފްލައިޓެއްގައި ސައުދީއަށް ދަތުކުރާނެ އެވެ.
