ކޮންމެ ހަފުތާއަކު ބޭންކުތަކުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ވިއްކަންޖެހޭ ބޭރުފައިސާގެ އަދަދު 90 އިންސައްތައަށް އިތުރުކުރުމަށް އެ އޮތޯރިޓީން ނިންމައިފިއެވެ.
އެމްއެމްއޭއިން އިއްޔެ ނެރުނު ބަޔާނެއްގައި ބުނެފައިވާ ގޮތުގައި، މި ބަދަލު ގެނެވޭނީ 1 ޖޫން 2025 އިން ފެށިގެންނެވެ. މިހާރު ބޭންކުތަކުން އެމްއެމްއޭއަށް ވިއްކަންޖެހެނީ 60 އިންސައްތައެވެ.
އެމްއެމްއޭގެ ބަޔާނުގައި ވިދާޅުވެފައިވަނީ، ބޭރު ފައިސާއާބެހޭ ޤާނޫނުގެ ދަށުން، ބޭރު ފައިސާއިން އާމްދަނީ ލިބޭ ފަރާތްތަކުން، ބޭންކުތަކަށް މާރުކުރާ ފައިސާގެ ތެރެއިން އޮތޯރިޓީން ކަނޑައަޅާ އިންސައްތައެއްގެ ޢަދަދަކަށް ބޭރު ފައިސާ ބޭންކުތަކުން އޮތޯރިޓީއަށް ވިއްކަންޖެހޭ ކަމަށެވެ.
މި ބަދަލު ގެނެސްފައިވަނީ، އެމްއެމްއޭއިން ބޭންކުތަކަށް ކޮންމެ ހަފްތާއަކު ވިއްކާ ބޭރު ފައިސާ މެދުވެރިކޮށް، މިހާރަށްވުރެ ހަރުދަނާ ގޮތެއްގައި، ވިޔަފާރިތަކަށް ބޭނުންވާ ބޭރު ފައިސާ ބޭންކުތަކުން ހަމަޖައްސައިދިނުމަށް މަގުފަހިކުރުމަށް ކަމަށް އެ އޮތޯރިޓީން ވިދާޅުވިއެވެ.
ރާއްޖޭގައި ޑޮލަރުގެ މައްސަލަ ހައްލުކުރުމަށް ފަތުރުވެރިކަމުގެ ދާއިރާގެ ވިޔަފާރިތަކަށް ލިބޭ ބޭރުފައިސާގެ ވަކި މިންވަރެއް ރައްޖޭގެ ބޭންކުތަކަށް މާރުކުރަން މަޖުބޫރުވާގޮތަށް މިފަހުން ވަނީ ޤާނޫނެއް ފާސްކޮށްފައެވެ. މި ޤާނޫނުގެ ދަށުން، މިދިޔަ މާޗް މަހުގެ ނިެ ނިޔަލަށް ފަތުރުވެރިންނަށް ޚިދުމަތްދޭ ތަންތަނުން ބޭންކުތަކަށް 150 މިލިޔަން ޑޮލަރަށްވުރެ ގިނަ ފައިސާ މާރުކޮށްފައިވާކަން ފާހަގަކުރެވެއެވެ.
