މަސްތުވާތަކެތީގެ ފަރުވާ ދިނުމަށް ތިން ރިމާންޑް ސެންޓަރު ހުޅުވައިފިއެވެ.
މިދިޔަ ހޮނިހިރު ދުވަހު މި ތިން ރިމާންޑް ސެންޓަރު ހުޅުވާފައިވަނީ އައްޑޫ ސިޓީ، ފުވައްމުލައް ސިޓީ އަދި ތިނަދޫ ސިޓީގައި ހުންނަނީ ޑިޓޮކްސް ފެސިލިޓީގައެވެ.
އެ ފެސިލިޓީތައް ހުޅުވާފައިވަނީ އިތުރު ފަރުވާތަކާއެކު ކަމަށް ނޭޝަނަލް ޑްރަގް އެޖެންސީ (އެންޑީއޭ) އިން ބުންޏެވެ. އެގޮތުން ފުވައްމުލައް އަދި ތިނަދޫގައި ދެމުން އަންނަނީ ޑްރަގް ޑިޓޮކްސިފިކޭޝަން އަދި ރިހެބިލިޓޭޝަންގެ މަސައްކަތެވެ. އަދި ހިތަދޫގައި ޤާއިމްކޮށްފައިވަނީ ވިލުނު ސެންޓަރެވެ.
އެންޑީއޭ އިން ބުނީ އެތަންތަނުގައި މީގެ ކުރިން ދެމުން އައި ހަމައެކަނި ޑިޓޮކްސް އަދި ކޮމިއުނިޓީ ފަރުވާ ކަމަށެވެ. ނަމަވެސް އެ ތަންނަނުން މިހާރު ރިމާންޑް ޚިދުމަތްވެސް ލިބޭނެ ކަމަށް އެންޑީއޭއިން ބުންޏެވެ.
އެންޑީއޭއިން ދެމުން އަންނަނީ ރެސިޑެންޝަލް އާއި ނޮން-ރެސިޑެންޝަލް ފަރުވާއެވެ. އޭގެ ތެރެއިން ރެސިޑެންޝަލް ފަރުވާގެ ތެރޭގައި ހިމެނެނީ ކ. ހިންމަފުށީގައި ހުންނަ ތެރަޕިއުޓިކް ކޮމިއުނިޓީ ރިހެބިލިޓޭޝަން ސެންޓަރާއި ރެސިޑެންޝަލް ޑިޓޮކްސް އާއި ސެމީ ރެސިޑެންޝަލް ފެސިލިޓީ އާއި ރިމާންޑް ސެންޓަރެވެ.
މަސްތުވާތަކެތީގެ މައްސަލައަކީ މުޅި ރާއްޖޭގައި ވެސް ވަރަށް ބޮޑުވެފައިވާ މައްސަލައެކެވެ. މި މައްސަލަ ޙައްލު ކުރުމަށް މީގެ ކުރީ ސަރުކާރުތަކުން އެދެވޭ މަސައްކަތެއް ކުރެވިފައެއް ނުވެއެވެ. ނަމަވެސް އަދުގެ ސަރުކާރުން އަންނަނީ މި ދައުރުގެ ތެރޭގައި މި މައްސަލައަށް ހައްލު ލިބިގެންދާނެ ކަމުގެ ޔަޤީންކަން ތަކުރާރުކޮށް ދެއްވަމުންނެވެ. އެގޮތުން މި ސަރުކާރުން އެކަން ކުރާނީ ސަޕްލައި ސައިޑަށް ބޮޑަށް އިސްކަންދީގެން ކަމަށް ދާޚިލީ ސަލާމަތާއި ފަންނިއްޔަތާއި ބެހޭ ވަޒީރު އަލީ އިހުސާން ވަނީ ވިދާޅުވެފައެވެ.
