ރާއްޖޭގައި ދުންފަތް ކޮންޓްރޯލްކުރުމަށް ކުރައްވާ މަސައްކަތްތައް ފާހަގަކޮށް، ދުނިޔޭގެ ސިއްޙަތު ޖަމްޢިއްޔާގެ ޚާއްސަ އެވޯޑެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ލިބިވަޑައިގެންފިއެވެ. މިއީ ދުންފަތް ކޮންޓްރޯލް ކުރުމަށްޓަކައި ކުރާ މަސައްކަތުގެ އަގު ވަޒަންކުރުމަށް ދުނިޔޭގެ ސިއްޙަތު ޖަމްޢިއްޔާއިން ކޮންމެ އަހަރަކު ދޭ އެވޯޑުތަކުގެ ތެރެއިން އެއް އެވޯޑެވެ.

މި އެވޯޑަކީ ޑަބްލިއުއެޗުއޯގެ ޑިރެކްޓަރ ޖެނެރަލް ޓެޑްރޮސް އަދަނަމް ގެބްރިއޭސުސް ދެއްވާ ޚާއްސަ ރިކޮގްނިޝަން އެވޯޑެކެވެ. މިއަހަރު ދުނިޔޭގެ އެކި ގައުމުތަކުން 36 ފަރާތަކަށް މިފަދަ އެވޯޑުތައް ދީފައިވާއިރު، ރައީސް މުޢިއްޒުގެ އިތުރުން މި އެވޯޑު ލިބިވަޑައިގަތީ މޮރިޝަސްގެ ހެލްތު އެންޑް ވެލްނެސް މިނިސްޓްރީއަށެވެ.

ރައީސް މުޢިއްޒުގެ ސަރުކާރުން ދުންފަތާއި ދެކޮޅަށް ހަރުކަށި ގިނަ ފިޔަވަޅުތަކެއް އަޅުއްވާފައިވެއެވެ. އޭގެ ތެރޭގައި ރާއްޖޭގައި ވޭޕް ބުއިމާއި ވިއްކުން އެއްކޮށް މަނާކުރުމާއި، ސިނގިރޭޓްގެ ޑިއުޓީ ބޮޑުކުރުން ހިމެނެއެވެ. އަދި 2007 ޖަނަވަރީ 1 އިން ފެށިގެން އުފަންވާ ހުރިހާ ކުދިން ދުންފަތުގެ އިސްތިއުމާލުކުރުން މަނާކުރުމަށްވެސް ވަނީ ނިންމާފައެވެ.

މި ޖެނެރޭޝަނަލް ބޭންއަކީ ދެކުނު އިރުމަތީ އޭޝިޔާގެ ޤައުމަކުން މިފަދަ ފިޔަވަޅެއް އެޅި ފުރަތަމަ ފަހަރުކަމަށް ދުނިޔޭގެ ސިއްޙަތު ޖަމްޢިއްޔާއިން ވަނީ ފާހަގަކުރައްވާފައެވެ. އަދި މިއީ ދުންފަތުގެ އިސްތިއުމާލު ނުކުރާ ދުޅަހެޔޮ މުސްތަގުބަލަކަށް ސަރަހައްދީގޮތުން ކުރާ މަސައްކަތަށް އެޅުނު ބާރެއްކަމަށްވެސް ބަޔާންކޮށްފައިވެއެވެ.

ރައީސް މުޢިއްޒުގެ ސަރުކާރުން މި ޖެނެރޭޝަނަލް ބޭން ކަނޑައެޅުއްވީ ރައްޔިތުންގެ ޚިޔާލު ހޯއްދެވުމަށް ސޯޝަލް މީޑިއާގައި ކުރިއަށްގެންދެވި ޕޯލެއްގެ ނަތީޖާއަށް ބެއްލެވުމަށްފަހުއެވެ. މިހާރު ވަނީ މިކަމާ ގުޅޭ ޤާނޫނީ އިޖުރާއާތުތައްވެސް ފުރިހަމަކޮށްފައެވެ.