ކުރީގެ ސަރުކާރުން ހިންގި ބިންވެރިޔާ ސްކީމުގެ ދަށުން ގުޅީފަޅުން ގޯތި ލިބިފައިވާ ފަރާތްތަކަށް މި މަހުގެ ތެރޭގައި ގޯތީގެ ރަޖިސްޓްރީ ދޭން ފަށާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް މިރޭ ވިދާޅުވެއްޖެ އެވެ.
ގުޅިފަޅުގެ ހިއްކާފައިވާ ސަރަހައްދުން ހުރިހާ ގޯއްޗެއް ދޭގޮތަށް ލޭންޑް ޔޫސް ޕްލޭން ބަދަލުކޮށް އެކަން މިނިސްޓްރީން އިއުލާން ކުރީ މިއަދު އެވެ.
މިނިސްޓަރު މުއްތަލިބު ވިދާޅުވި ގޮތުގައި، ގުޅީފަޅުގެ ލޭންޑް ޔޫސް ޕްލޭނަށް ގެނެވުނު ބަދަލާއި ގުޅިގެން، ކުރިން ނުހިއްކާ އޮތް ސަރަހައްދުން ދޫކޮށްފައިވާ ގޯތިތައް މިހާރު ހިއްކާފައިވާ ސަރަހައްދުން ދޫކުރާމެއެވެ. މިއީ ރައީސް މުޢިއްޒުގެ ވަޢުދުފުޅާއި އެއްގޮތަށް، ރައްޔިތުންނަށް ވީހާވެސް އަވަހަކަށް ގޯތީގެ ރަޖިސްޓްރީ ދިނުމަށްޓަކައި ގެނެވުނު ބަދަލެކެވެ.
"ރައީސުލްޖުމްހޫރިއްޔާގެ ސިޔާސަތަކީ ގޯތިތަކުގެ ރަޖިސްޓްރީ ވީހާވެސް އަވަހަކަށް ދެއްވުން ކަމުގައިވުމާއެކު، ގުޅީފަޅުން ދޭން ކަނޑައެޅި ހުރިހާ ގޯތިތަކެއް ހިއްކާފައިވާ ސަރަހައްދުން ދޭން ނިންމައި ޕްލޭނަށް ބަދަލު ގެނެވި މިހާރު ވަނީ ގެޒެޓުކުރެވިފައެވެ،" މިނިސްޓަރު މުއްތަލިބު ވިދާޅުވިއެވެ.
މި ބަދަލާއެކު، ކުރިން ނުހިއްކާ އޮތް ސަރަހައްދުން ގޯތި ލިބިފައިވާ ފަރާތްތަކަށް މިހާރު ހިއްކާފައިވާ ސަރަހައްދުން ގޯތި ލިބޭނެއެވެ. މީގެ އިތުރުން، ކޮމާޝަލް އަދި އިންސްޓިޓިއުޝަނަލް ބޭނުންތަކަށް ކަނޑައަޅާފައިވާ ބިންތައް ވެސް ވަނީ އަލުން ރޭވިފައެވެ.
މިނިސްޓަރު މުއްތަލިބު ވިދާޅުވީ، މާތްﷲގެ އިރާދަފުޅާއެކު މި މަސް ތެރޭގައި ގުރުއަތުލުން ބާއްވައި ބިންތަކުގެ ރަޖިސްޓްރީ ހަދައި ދޭން ފެށޭނެ ކަމަށާއި، އަދި ސާވޭ ނިމުނުހާ އަވަހަކަށް ހަވާލުކުރެވެން ހުރި ބިންތައް ބިމުގެ ވެރިފަރާތްތަކާ ހަވާލުކުރެވޭނެ ކަމަށެވެ.
މި ސަރުކާރުން ގުޅީފަޅުން މިހާރު ދޫކުރުމަށް ނިންމާފައިވަނީ 3،520 ގޯއްޗެވެ. މިއީ ގިރާވަރުފަޅުން ލިބުނު ގޯތި ގުޅީފަޅަށް ބަދަލުކުރަން އެދުނު ފަރާތްތައް ވެސް ހިމަނައިގެންނެވެ.
މީގެ އިތުރުން، ސާވޭ މަސައްކަތްތައް ނިމުމާއެކު ވީހާވެސް އަވަހަކަށް ހަވާލުކުރެވެން ހުރި ބިންތައް ބިމުގެ ވެރިފަރާތްތަކާ ހަވާލުކުރާނެ ކަމަށް ވެސް މިނިސްޓަރު ވިދާޅުވިއެވެ.
އާ ލޭންޑް ޔޫސް ޕްލޭނުގައި ހައުސިންގ ޔުނިޓްތަކާއި ރެސިޑެންޝަލް ޕްލޮޓްތަކުގެ އިތުރުން، ސަރުކާރު އޮފީސްތަކާއި، ކޮމާޝަލް ޒޯނާއި، ވިޔަފާރިތަކަށް ޚާއްޞަ ސަރަހައްދުތަކާއި، ޓޫރިޒަމަށް ޚާއްޞަ ސަރަހައްދުތަކުގެ އިތުރުން ސްކޫލުތަކާއި މިސްކިތްތައް ވެސް ހިމެނިފައިވާކަން ފާހަގަކުރެވެއެވެ.
