މުވާސަލާތީ ގޮތުން ދުނިޔެ ދެކެމުން އަންނަ ހަލުވި ކުރިއެރުމުގެ ބޭނުން ހިފަންވީ ގައުމަށް ވަންނަ އާމްދަނީ އިތުރުކުރެވޭނެ މަގުތައް ފަހިކުރުމަށް ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.
މިއަދު ފާހަގަކުރާ ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަހުގެ މުނާސަބަތުގައި ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ މުވާސަލާތީ ގޮތުން ދުނިޔެ މިދެކޭ ހަލުވި ކުރިއެރުމުގެ ބޭނުން ހިފަންވީ ރާއްޖެ އިޝްތިހާރުކުރުމަށް ކަމަށެވެ.
ރާއްޖޭގެ މަގުބޫލުކަން އިތުރު ކުރުމަށް ގައުމަށް އާމްދަނީ ހޯދޭނެ މަގުތައް ފަހިކުރުމަށް އެ ކުރިއެރުންތަކުގެ ބޭނުން ހިފަން ޖެހޭ ކަމަށް ރައީސް ވިދާޅުވި އެވެ.
"މުވާސަލާތާއި މައުލޫމާތު ފެތުރުމުގެ ދާއިރާގެ އެކި މަސައްކަތްތައް ރާއްޖޭގައި ކުރައްވަވާ ހުރިހާ ހިދުމަތްތެރީންނަށް، ތަހުނިޔާ ދަންނަވަން،" ރައީސް ވިދާޅުވި އެވެ.
"ގައުމުގެ ތަރައްގީ އާއި މުސްތަގުބަލަށް މުހިންމު މި ހިދުމަތުގައި އިތުރު ކުރިއެރުމާއި ކާމިޔާބީއަށް އެދެން."
ކޮންމެ އަހަރެއްގެ މެއި މަހުގެ 17 ވަނަ ދުވަހަކީ، ބައިނަލްއަގުވާމީ ގޮތުން ފާހަގަކުރާ ދުނިޔޭގެ މުވާސަލާތާއި މައުލޫމާތުގެ ދާއިރާގެ ދުވަހެވެ. މި އަހަރުގެ ދުނިޔޭގެ މުވާސަލާތީ ދުވަހުގެ ޝިއާރަކީ "ޖެންޑާ އިކުއަލިޓީ އިން ޑިޖިޓަލް ޓްރާންސްފޯރމޭޝަން" އެވެ.
ރާއްޖެއަކީ ޑިޖިޓަލައިޒޭޝަންގައި ކުރިއަރާފައިވާ ގައުމަކަށް ހެދުމަކީ ރައީސް ޑރ. މުއިއްޒުގެ ސަރުކާރުގެ މުހިންމު އަމާޒެކެވެ. އެ ލަނޑުދަނޑި ހާސިލްކުރުމަށް މޯލްޑިވްސް 2.0 ގެ ނަމުގައި ހާއްސަ އިނީޝިއޭޓިވްއެއް ވެސް މި މަހު އިފްތިތާހުކޮށްފައިވެ އެވެ.
