މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ރާއްޖޭގެ ގުދުރަތީ ރީތިކަމާއި ސަޤާފަތާއި ތަފާތު ތަޖުރިބާތައް ދައްކުވައިދޭ "ވިޒިޓް މޯލްޑިވްސް ވީކް" އިޓަލީއާއި ފަރަންސޭސިވިލާތުގައި ފަށައިފިއެވެ.

މި ހަރަކާތުގައި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 12 ކުންފުންޏަކުން 18 މަންދޫބުން ބައިވެރިވެއެވެ. އިޓަލީގައި މި ރޯޑްޝޯ އޮތީ މި މަހުގެ 14 ވަނަ ދުވަހު ރޯމްގައި އަދި 15 ވަނަ ދުވަހު މިލާނުގައެވެ. ފަރަންސޭސިވިލާތުގައި ރޯޑްޝޯތައް ބޭއްވުމަށް ހަމަޖެހިފައިވަނީ މި މަހުގެ 19 ވަނަ ދުވަހު ލިއޯންގައި އަދި 20 ވަނަ ދުވަހު ޕެރިހުގައެވެ.

މި ހަރަކާތުގެ މައިގަނޑު މަޤްސަދަކީ ރާއްޖޭގެ ހިތްގައިމު ގުދުރަތީ ރީތިކަމާއި މުއްސަނދި ސަޤާފަތާއި ތަފާތު ތަޖުރިބާތައް ދައްކުވައިދީ، ޔޫރަޕްގެެ މުހިންމު ދެ މާކެޓްގައި ދިވެހިރާއްޖޭގެ މަޤްބޫލުކަން އިތުރުކުރުމެވެ. މީގެ އިތުރުން، އިންޑަސްޓްރީ ޕާޓްނަރުންނަށް އައު ގުޅުންތައް އުފެއްދުމުގެ ފުރުސަތު ހޯދައިދީ، މިހާރު އޮތް ގުޅުންތައް އިތުރަށް ބަދަހިކުރުމަށް މަސައްކަތްކުރެވޭނެއެވެ.

މި ހަރަކާތުގައި ރާއްޖޭގެ ހިތްގައިމުކަން ދައްކާލުމުގެ ގޮތުން އިޓަލީއާއި ލިއޯންގައި އިންޓަރެކްޓިވް ކުއިޒްއަކާއި ވޯކްޝޮޕްއެއް ބޭއްވުމަށް ހަމަޖެހިފައިވާއިރު، ޕެރިހުގައި މީޑިއާ ކޮމްޕޯނެންޓެއް ބޭއްވުމަށް ވަނީ ހަމަޖެހިފައެވެ. މި ރޯޑްޝޯތަކުގައި ބީޓުބީ ބައްދަލުވުންތަކާއި ނެޓްވޯކިންގ އަދި ޑެސްޓިނޭޝަން ވޯކްޝޮޕްތައް މެދުވެރިކޮށް އިންޑަސްޓްރީގެ ފަރާތްތައް ހަރަކާތްތެރިވެ، އަގުހުރި ގުޅުންތައް އުފައްދައި، ހިތްގައިމު ފަތުރުވެރިކަމުގެ މަންޒިލެއްގެ ގޮތުގައި ރާއްޖެ ޕްރޮމޯޓްކުރާނެއެވެ.

އިޓަލީވިލާތާއި ފަރަންސޭސިވިލާތަކީ ރާއްޖޭގެ ފަތުރުވެރިކަމުގައި މުހިންމު ދެ މާކެޓެވެ. އެމްއެމްޕީއާރުސީގެ އަމާޒަކީ މި ހަރަކާތުން ރާއްޖެއަކީ އިޓަލީ އަދި ފަރަންސޭސިވިލާތުގެ ފަތުރުވެރިންގެ އެންމެ އެދެވޭ މަންޒިލެއްގެ ގޮތުގައި އިޝްތިހާރުކުރުން ކަމަށް އެ ކުންފުނިން ވަނީ ބުނެފައެވެ.