^{އިލާލާ ޓީއެންޓީ ފުޓްސަލް ޗެލެންޖް 2025 ގެ ޗެމްޕިއަން ޓީމަށް ރޭ ލިބުނު ފަޚުރުވެރި ޓްރޮފީ / ފޮޓޯ: ޚުލާޞާ}

ރޭ ކުޅުނު ރާއްޖޭގެ ފުޓްސަލް މައިދާނުގައި އެންމެ އަގުބޮޑު 23 އަހަރުން ދަށުގެ މުބާރާތް ކަމަށްވާ "އިލާލާ ޓީއެންޓީ 23 އަހަރުން ދަށުގެ ފުޓްސަލް ޗެލެންޖް 2025" ގެ ފައިނަލް މެޗު، ޕާކް ބޯއީސް ކޮޅަށް 3 ލަނޑު ޖަހައިގެން ޕާކް ސްޕޯޓްސް ކުލަބުން އެ ޓީމުގެ ޗެމްޕިއަންކަން ފަޚުރުވެރިކަމާއެކު ދިފާއުކޮށްފިއެވެ.

ފޯރި ގަދަ މި މުބާރާތުގެ ފައިނަލުގައި ޕާކް ސްޕޯޓްސް ކުލަބު ރޭ ވާދަކުރީ މި މުބާރާތުގައި އަލަށް ބައިވެރިވެ ފައިނަލަށް ދަތުރުކުރި ޕާކް ބޯއީސްއާ ދެކޮޅަށެވެ.

މި މުބާރާތުގެ ކުއާޓާ ފައިނަލުން ފެށިގެން ހުރިހާ މެޗެއް ޓީއެންޓީ ސޯޝަލްމީޑިއާއިންނާއި ޔީޓިއުބް އިން ވަގުތުން ދުރަށް ދެއްކިއިރު. މުބާރާތުގެ މީޑިއާ ޕާޓްނަރަކީ ޚުލާޞާ އެވެ

^{އިލާލާ ޓީއެންޓީ ފުޓްސަލް ޗެލެންޖް 2025 ގެ މީޑިއާ ޕާޓްނަރު ޚުލާޞާގެ ފަންނުވެރި އަމަން ހަނދާނީ ފިލާ އާއި ޙަވާލުވަނީ / ފޮޓޯ: ޚުލާޞާ}

ފައިނަލް މެޗުގެ ފުރަތަމަ ހާފުގައި ދެ ޓީމުން ވެސް ދެއްކީ ވަރަށް ވާދަވެރި ކުޅުމެކެވެ. ނަމަވެސް މެޗުގެ ހަތަރުވަނަ މިނެޓުގައި ޕާކް ސްޕޯޓްސް ކުލަބުގެ މުހައްމަދު އިސާމް ވަނީ އެ ޓީމަށް ލީޑު ހޯދައިދީފައެވެ. މި ލަނޑު އޭނާ ޖެހީ ޝަނާން ރަޝާދު ކޯނަރުން ހުރަސްކޮށްދިން ބޯޅައެއް ބޮލުން ޖަހައިގެންނެވެ. ފުރަތަމަ ހާފު ނިމުނުއިރު ސްކޯރ އަކީ 1-0 އެވެ.

ދެވަނަ ހާފުގައި ޕާކް ސްޕޯޓްސް ކުލަބުން ވަނީ އިތުރު ދެ ލަނޑު ޖަހައި، މުޅި މެޗުގެ ނަތީޖާ 3-0 އަށް ބަދަލުކޮށްފައެވެ. މި ދެ ލަނޑުގެ ތެރެއިން އެއް ލަނޑު ޖެހީ ޝަނާން ރަޝާދެވެ. އަނެއް ލަނޑަކީ ޕާކް ބޯއީސްގެ ނާއިލްގެ އަތުން ބައިކޮޅަށް ވަން ގޯލެކެވެ. މި މެޗުގެ އެންމެ މޮޅު ކުޅުންތެރިޔާގެ މަޤާމު ހޯދީ ޕާކް ސްޕޯޓްސް ކުލަބުގެ ގޯލްކީޕަރު ފައްޔާޒު ފަޔާޒެވެ.

^{ފައިނަލް މެޗުގެ އެންމެ މޮޅު ކުޅުންތެރިޔާ، ޕާކް ސްޕޯޓްސް ކުލަބުގެ ގޯލްކީޕަރު ފައްޔާޒު ފަޔާޒް އަށް ހަނދާނީ ފިލާ އަރުވަނީ. / ފޮޓޯ: ޚުލާޞާ}

މުބާރާތުގެ އެހެނިހެން އެވޯޑުތަކަށް ބަލާއިރު، އެންމެ ގިނަ ލަނޑު ޖެހި ކުޅުންތެރިޔާގެ މަޤާމު ހޯދީ ސްޕޯޓްސް ކްލަބް ބަފާނާގެ މުހައްމަދު ރިފާއު ހަސަނެވެ.

^{އިލާލާ ޓީއެންޓީ ފުޓްސަލް ޗެލެންޖް 2025 ގެ އެންމެ ގިނަ ލަނޑު ޖެހި ކުޅުންތެރިޔާގެ މަޤާމު ހޯދި ސްޕޯޓްސް ކްލަބް ބަފާނާގެ މުހައްމަދު ރިފާއުއަށް ހަނދާނީ ފިލާ އަރުވަނީ / ފޮޓޯ: ޚުލާޞާ}

ފެއަރ ޕްލޭ ކުޅުންތެރިޔާގެ މަޤާމު ހޯދީ ކްލަބް ގަލަކްޓިކޯސްގެ އަހުމަދު ރާހިލް ރަޝީދެވެ. އަދި ފެއަރ ޕްލޭ ޓީމަކަށް ހޮވުނީ ޕީކޭ އެކަޑެމީއެވެ. މުބާރާތުގެ އެންމެ މޮޅު ކޯޗަކަށް ހޮވުނީ ޕީކޭ އެކަޑެމީގެ ކޯޗް އަހުމަދު ވިސާލެވެ.

^{އިލާލާ ޓީއެންޓީ ފުޓްސަލް ޗެލެންޖް 2025 ގެ ކްލަބް ގަލަކްޓިކޯސްގެ އަހުމަދު ރާހިލް ރަޝީދު އަށް ހަނދާނީ ފިލާ އަރުވަނީ / ފޮޓޯ: ޚުލާޞާ}

މުބާރާތުގެ އެންމެ މޮޅު ފަސް ކުޅުންތެރިން:

އިބްރާހިމް ޝައުފު މުހައްމަދު (ޕާކް ބޯއީސް)،

ޝަނާން ރަޝާދު (ޕާކް ސްޕޯޓްސް ކުލަބު)،

އަހުމަދު އަފްލާޒް (ޓީއެފްޕީ)،

ފައްޔާޒު ފަޔާޒް (ޕާކް ސްޕޯޓްސް ކުލަބު) އަދި

މުހައްމަދު ޝާއިން (ޕާކް ސްޕޯޓްސް ކުލަބު) އެވެ.

މުބާރާތުގެ އެންމެ މޮޅު ކުޅުންތެރިޔާގެ މަޤާމު ހޯދީ ޕާކް ސްޕޯޓްސް ކުލަބުގެ ޝަނާން ރަޝާދެވެ.

"އިލާލާ ޓީއެންޓީ 23 އަހަރުން ދަށުގެ ފުޓްސަލް ޗެލެންޖް 2025" ގެ ސަބަބުން، ރާއްޖޭގެ ޒުވާން ފުޓްސަލް ކުޅުންތެރިންނަށް އެމީހުންގެ ހުނަރު ދައްކާލުމުގެ ފުރުސަތު ލިބި، ޤައުމީ ފެންވަރުގައި ފާހަގަކުރެވޭ ކުޅުންތެރިން އުފެދިގެން ދިޔަކަން ފާހަގަކުރެވެއެވެ.

މި މުބާރާތުގެ މީޑިއާ ޕާޓްނަރަކީ ޚުލާޞާ އެވެ.