ރާއްޖޭގެ އެންމެ ފޯރިގަދަ 23 އަހަރުން ދަށުގެ ފުޓްސަލް މުބާރާތް ކަމަށްވާ އިލާލާ ޓީއެންޓީ އަންޑަރ23 ފުޓްސަލް ޗެލެންޖް 2025ގެ ފައިނަލަށް ޕާކް ސްޕޯޓްސް ކްލަބް ދަތުރުކޮށްފިއެވެ.

މުބާރާތުގެ ކުއާޓާ ފައިނަލް މެޗުން ފެށިގެން ހުރިހާ މެޗެއް ވަހުތުން ދުރަށް ދައްކާއިރު، ރެހެންދި ސްޓޭޑިއަމްގައި ކުޅުނު ރޭގެ މެޗު ޔޫޓިއުބް ޗެނަލުންނާއި ޓީއެންޓީ ފޭސްބުކް ޕޭޖުން ވަގުތުން ދުރަށް ދެއްކިއެވެ.

މި މުބާރާތުގެ މީޑިއާ ޕާޓްނަރަކީ ޚުލާޞާ އެވެ.

ޕާކް ސްޕޯޓްސް ކްލަބަކީ މުބާރާތުގެ އެންމެ ފަހުގެ ޗެންޕިއަނުންނެވެ. އެ ޓީމު ފައިނަލަށް ދަތުރުކުރީ ރޭ ސެމީގައި 4-1 އިން ތިމަރަފުށި ޓީއެފްޕީ ބަލިކޮށްގެންނެވެ. މިއީ މުބާރާތުގެ 56ވަނަ މެޗެވެ.

ރޭ ބަލިވި ޓިއެފްޕީ އަކީ ކުއާޓާ ފައިނަލުގައި އެންމެ ގިނަ ގޯލް ޖަހައިގެން ސެމީއަށް އައި ޓީމުކަން ވެސް ފާހަގަ ކުރެވެއެވެ.

ޓީއެފްޓީން ސެމީއަށް އައީ އިއްޔެރޭ ކުޅުނު ކުއާޓާ ފައިނަލުގެ ފަހު މެޗުގައި 6-1 އިން އާކޯންސް ބަލިކޮށްގެންނެވެ.

މުބާރާތުގެ އެންމެ ފަހުގެ ޗެމްޕިއަން ޕާކް ސްޕޯޓްސް ކުލަބުން ސެމީއަށް އައީ، ކުއާޓާ ފައިނަލުގައި 3-0 އިން ސްޕޯޓްސް ކްލަބް ބަފަނަ ބަލިކޮށްގެންނެވެ.

ފައިނަލް މެޗުގައި ޕާކްސްޕޯޓްސް ބައްދަލުކުރާނީ މުބާރާތުގެ ފައިނަލްގެ ފުރަތަމަ ޖާގަ ކަށަވަރުކުރި ޕާކް ބޯއީސްއާއި ދެކޮޅަށެވެ.