ރާއްޖޭގެ އެންމެ ފޯރިގަދަ 23 އަހަރުން ދަށުގެ އިލާލާ ޓީއެންޓީ ފުޓްސަލް ޗެލެންޖް 2025 ގައި ރޭ ފޯރިގަދަ ކުޅުމަކަށްފަހު ޕާކް ބޯއީސް އިން ސެމީގެ ޖާގަ ކަށަވަރު ކޮށްފިއެވެ.

ކުއާޓަ ފައިނަލުގައި ގަލަކްޓިކޯއާއި ކުޅެ މެޗުގެ ފުރިހަމަ ވަގުތު ހަމަވިއިރު އޮތީ 1-1 އިން އެއްވަރު ވެފައެވެ. އެހެންވެ، ނަތީޖާ ނެރުނީ ޕެނަލްޓި ޖަހައިގެންނެވެ.

ރޭ ފުރަތަމަ ގޯލު ޖެހީ ވެސް ގަލަކްޓިކޯސް އިންނެވެ. އެ ގޯލް ޖަހައިދިނީ މުބާރާތުގައި މޮޅު ކުޅުމެއް ކުޅެމުން އަންނަ އަލްސަން އެވެ.

^{ގަލަކްޓިކޯސްގެ ކުޅުންތެރިޔެއްގެ އަތުން ބޯޅަ ހޯދުމަށް ޕާކް ބޯއީސްގެ ކުޅުންތެރިޔަކު މަސައްކަތް ކުރަނީ. މި މެޗު ޕެނަލްޓީ ޖަހައިގެން ކާމިޔާބުކުރީ ޕާކް ބޯއީސް.. / ފޮޓޯ: ޓީއެންޓީ ފުޓްސަލް ޗެލެންޖް 2025}

ފުރަތަމަ ހާފް ނިންމާލީ 1-0 އިން ޕާކް ބޯއީސް ބަލިވެފައި އޮވެގެންނެވެ. އެހެންނަމަވެސް، އިތުރު ހިއްވަރަކާއެކު ހުމޭޒްގެ ޕާހަކުން މުހައްމަދު އިޔާދު ވަނީ ނަތީޖާ ހަމަހަމަކޮށްދީ، ޕެނަލްޓީގައި ޓީމު މޮޅުވުމަށް މުހިންމު ދައުރެއް އަދާކޮށްދީފައެވެ.

ރޭ ނޭވާ ހިފަހައްޓައިގެން ތިބޭ ވަރުގެ ކުޅުމެއް ފެނިގެންދިޔައިރު ދެޓީމުން ވެސް ފެނުނީ ހަމަހަމަ ކުޅުމެކެވެ.

ޕެނަލްޓީގައި ގަލަކްޓިކޯސްގެ 2 ޕެނަލްޓީ، ޕާކް ބޯއީސްގެ ކީޕަރު ސަލީލް ވަނީ ސޭވް ކޮށްފައެވެ. އޭނާ އަކީ މި މެޗުގެ އެންމެ މޮޅު ކުޅުންތެރިޔާ ވެސް މެއެވެ.

ގަލަކްޓިކޯސް 1-3 އިން ބަލިކޮށް ޒުވާން ހުނަރުވެރި ޕާކް ބޯއީސް ސެމީއަށް ދިޔައިރު، އެ ޓީމު ސެމީގައި ބައްދަލުކުރަން ޖެހެނީ ޕީކޭ އެކަޑަމީއާއެވެ.

މި މުބާރާތުގެ މީޑިއާ ޕާޓްނަރަކީ ޚުލާސާއެވެ.

ކުއާޓައިން ފެށިގެން މެޗުތައް މުބާރާތުގެ ޕޭޖުންނާއި ޔޫޓިއުބް ޗެނަލް މެދުވެރިކޮށް ވަގުތުން ދުރަށް ދައްކާކަން ވެސް ފާހަގަ ކުރެވެއެވެ.