ބަންގުލަދޭޝްގެ ރައްޔިތަކު ޤާނޫނާއި ޤަވާޢިދާއި ޚިލާފަށް ދިވެހިރާއްޖެއަށް ބިދޭސީން ގެނައުމުގެ ވިޔަފާރިކޮށް ޖިނާއީ ކުށްކޮށްގެން ފައިސާ ހޯދައި މަނީލޯންޑްރިންގ ޢަމަލުތަކެއް ހިންގާފައިވާ މައްސަލައިގެ ތަޙުޤީޤު ނިންމައި ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
މި މައްސަލައާއި ގުޅިގެން ފުލުހުންގެ ތަޙުޤީޤު ނިންމައި ދައުވާކުރުމަށް ފޮނުވާފައިވަނީ ޝަހާދަތު ހޮސައިން، ބަންގްލަދޭޝް، (34އ) ގެ މައްޗަށެވެ. އޭނާ ހައްޔަރުކޮށްފައި ވަނީ 2025 ޖަނަވަރީ 21 ވަނަ ދުވަހު ކޯޓު ޢަމުރުގެ ދަށުންނެވެ.
ފުލުހުން ބުނީ ޝަހާދަތު ހޮސައިންއަކީ 2014 ވަނަ އަހަރުން ފެށިގެން ހަތަރު ވޯކްޕާމިޓެއްގައި ދިވެހިރާއްޖޭގައި އުޅެމުން ގޮސްފައިވާ މީހެއްކަން ތަޙުޤީޤުގެ ތެރެއިން ދެނެގަނެވިފައިވާ ކަމަށެވެ. އަދި އޭނާ ގެންގުޅޭ މޯބައިލް ފޯނާއި ލެޕްޓޮޕްގައި އެކި ކުންފުނިތަކުގެ ރަޖިސްޓްރީއާއި ލޯގޯ، ސްޓޭމްޕް އަދި ބިދޭސީން ހިމެނޭގޮތަށް އެކި މީހުންގެ ސޮއި އަދި ވޯކްޕާމިޓާއި ކޯޓާ ނެގުމަށް ބޭނުންވާ ލިޔެކިޔުމުގެ އިތުރުން ބިދޭސީންގެ ޕާސްޕޯޓު ކޮޕީއާއި ބައެއް ދިވެހިންގެ އައިޑީކާޑު ފޮޓޯ ވެސް ފެނިފައިވާ ކަމަށް ފުލުހުން ބުންޏެވެ. މީގެ އިތުރުން، ވޯކްޕާމިޓް ސައިޓުތަކަށް ވަދެފައިވާކަމުގެ ވެބް ހިސްޓްރީ ވެސް ތަޙުޤީޤަށް ލިބިފައިވާ ކަމަށް ފުލުހުން ބުންޏެވެ.
Advertisement
ފުލުހުން ބުނީ ޝަހާދަތު ފުރަތަމަ ރާއްޖެ އައީ 2014 ވަނަ އަހަރު ކަމަށެވެ. އަދި 2019 ވަނަ އަހަރު މާލެ އައިސް ބެންކު އޮފް މޯލްޑިވްސްގައި ހަތަރު އެކައުންޓެއް އޭނާ ހުޅުވާފައިވާ ކަމަށާއި، 2019 ވަނަ އަހަރުގެ އޮކްޓޫބަރު މަހުން ފެށިގެން އޭނާގެ އެކައުންޓްތަކަށް 8 މިލިއަނަށް ވުރެ ގިނަ ރުފިޔާ ޖަމާވެ ދައުރުކޮށްފައިވާ ކަމަށް ފުލުހުން ބުންޏެވެ.
ޝަހާދަތު އެންމެ ފަހުން ރާއްޖެ އެތެރެވީ އޮފީސް ބޯއީއެއްގެ ވަޒީފާއަށް ނަމަވެސް އޭނާއަށް 3,000 ޑޮލަރުގެ ބޮޑު މުސާރަ ލިބޭ ކަމަށާއި، އޭނާ އުޅެމުން ގެންދިޔައީ 18,000 ރުފިޔާއަށް ދެ ކޮޓަރީގެ އެޕާޓްމަންޓެއް ގައި ކަމަށް ވެސް ތަޙުޤީޤަށް އެނގިފައިވާކަމަށް ފުލުހުން ބުންޏެވެ.
ފުލުހުން ބުނީ ޝަހާދަތުގެ ލެޕްޓޮޕުން މައްސަލައާ ގުޅޭ ވަރަށް ގިނަ ލިޔުންތަކާއި އެކި ކުންފުނިތަކުގެ ސްޓޭމްޕާއި ދިވެހީންގެ އައިޑީކާޑު ކޮޕީތައް ފެނިފައިވުމުން ތަޙުޤީޤަށް ހާމަވާކަމަކީ ޝަހާދަތަކީ ވަރަށް ފުޅާ ދާއިރާއެއްގައި ބިދޭސީން ރާއްޖެ އެތެރެކޮށް އޭގެން މާލީ މަންފާ ހޯދާ ފަރާތެއް ކަމަށެވެ.
މިއީ ވަރަށް ފުޅާ ދާއިރާއެއްގައި ބިދޭސީން އެތެރެކޮށް މާލީ މަންފާ ހޯދަމުންދާ ނެޓްވޯކެއްކަން އެނގިފައިވާ ކަމަށާއި، މި ނެޓްވޯކުން އެކި ކުންފުނިތަކުގެ ކޯޓާ ނަގާ ބިދޭސީން އެތެރެކޮށް އެ މީހުން މާލެތެރެއަށް ދޫކޮށްލާފައިވާ ކަމަށް ފުލުހުން ބުންޏެވެ. އަދި ސައްޙަ ނޫން ވޯކްޕާމިޓް ހަދާ ބަންގްލަދޭޝްގައި ތިބޭ މީހުންނަށް ފޮނުވާ ޝަހާދަތު ބުނާ އެކައުންޓަކަށް ފައިސާ ޖަމާކުރަން އަންގާ ކަމަށް ބުނެފައިވާކަން ތަޙުޤީޤަށް އެނގިފައިވާކަމަށް ވެސް ފުލުހުން ބުންޏެވެ.
މިކަމުގައި ދިވެހީންގެ ގިނަ ބަޔަކާއި އިމިގްރޭޝަންގެ ބައެއް މުވައްޒަފުންގެ ބައިވެރިވުން އޮތް ކަމަށް ތުހުމަތުކުރެވޭ އިރު، އެ މައްސަލަ ވަކި މައްސަލައެއްގެ ގޮތުގައި ތަޙުޤީޤުކުރަމުން އަންނަ ކަމަށްވެސް ފުލުހުން ބުންޏެވެ.
