ރާއްޖޭގައި ކުޑަކުދިންގެ ރައްކާތެރިކަމާއި ގުޅޭ ގޮތުން ކަންބޮޑުވާ ހިސާބަކަށް ކަންކަން ގޮސްފި ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސްގެ ފަހުގެ ތަފާސްހިސާބުތަކުން ދައްކައިފިއެވެ. ގާތްގަނޑަކަށް %16 ކުދިންނަކީ ސްކޫލަށް ނުދާ ކުދިންނެވެ. ވަޒީފާއެއްގައި ވެސް ނޫޅެއެވެ. ވޮކޭޝަނަލް ޓްރޭނިންގއެއްގައި ބައިވެރިވާކަށް ވެސް ބޭނުމެއް ނުވެއެވެ. މީގެ އިތުރުން ކުޑަކުދިންގެ އާބާދީގެ %2 ދިރިއުޅެނީ ބެލެނިވެރިންގެ އަޅާލުމެއް ނެތިއެވެ. ގެއިން ބޭރުގައެވެ. ބެލެނިވެރިޔަކާއި ނުލައި އުޅޭ އުމުރުން 2 އަހަރާއި 17 އަހަރާ ދެމެދުގެ ކުދިންގެ %3.3 އާއި ހަމައަށް އެކި އަތޮޅުތަކުގައި އެބަ އުޅެއެވެ.

އުމުރުން 15 އަހަރާއި 17 އަހަރާ ދެމެދުގެ ކޮންމެ ހަ ކުއްޖަކުން ގާތްގަނޑަކަށް 5 ކުއްޖަކީ “ވީއްލިގެން އުޅޭ” ކުދިންގެތެރެއަށް ވަނުމުގެ ފުރުޞަތު އޮތް ކުދިންނެވެ.

ރާއްޖޭގައި ކުޑަކުދިންނަށް ކުރާ އަނިޔާއަކީ ވެސް އިންތިހާއަށް ބޮޑު އަނެއް ކަންބޮޑުވުމެކެވެ. ނޮވެމްބަރު 2023 ގައި އެކަނިވެސް ކުޑަކުދިންނަށް ކުރާ އަނިޔާގެ ސަތޭކަ އެއްތިރީސް މައްސަލައެއް ކަމާބެހޭ ފަރާތްތަކުން ރިޕޯޓްކޮށްފައިވާއިރު، އޭގެ ތެރޭގައި ޖިންސީ ގޮތުން އެކުދިންނަށް ދީފައިވާ އަނިޔާ ހިމެނެއެވެ. މިއީ ކުޑަކުދިންގެ މުސްތަޤްބަލަށް އެޅިފައިވާ ކަޅު އަނދިރިކަމެކެވެ.

މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން 2023 ވަނަ އަހަރު ކުޑަކުދިންނަށް ކުރާ އަނިޔާގެ ޖުމްލަ 889 މައްސަލަ ރެކޯޑް ކޮށްފައި ވާއިރު، މިއީ ރާއްޖެ ފަދަ ކުޑަ ޤައުމެއްގައި އެކަށީގެންވާ މިންވަރަށްވުރެ ބޮޑު ޢަދަދެކެވެ. މި ތަފާސްހިސާބުތަކުން މި ޤައުމުގައި ކުޑަކުދިންގެ ރައްކާތެރިކަމުގެ ފުރިހަމަ ސިޔާސަތުތަކާއި ޕްރޮގްރާމްތައް މިހާރުންމިހާރަށް އިތުރަށް ހަރުދަނާކޮށް ހިންގާން އެބަ ޖެހެއެވެ. އެހެންނޫންނަމަ، މި 889 ކުދިންގެ ޢަދަދު ބޮޑުތަނުން އިތުރުވެ ދުރުނޫން މުސްތަޤްބަލެއްގައި މީގެ ނުބައި އަސަރު ޤައުމަށް ކުރިމަތިވެ ޚައްޞަކޮށް އިޖްތިމާޢީ އިތުރު މައްސަލަތައް “މިހާރަށްވުރެ ފުޅާ ދާއިރާގައި” ނުކުތުމުގެ ފުރުޞަތު އެބަ އޮތެވެ.

މިކަންކަން ހައްލުކުރުމަށްޓަކައި ސަރުކާރުގެ އިދާރާތަކާއި، ސަރުކާރު ނޫނަސް، އަމިއްލަ ޖަމްޢިއްޔާތަކާއި، މުޅި ޖަމާޢަތް ވަގުތުން ވަގުތަށް މަސައްކަތްކުރާން ޖެހިއްޖެއެވެ. ޤައުމުގެ ކުދިންގެ ސަލާމަތާއި ދުޅަހެޔޮކަން ކަށަވަރުކުރުމަށް އެއްބައިވަންތަ މަސައްކަތްތަކެއް ކުރަންޖެހެއެވެ. ރައްޔިތުންގެ ޓެކްސް ފައިސާއިން ޤައުމުގެ މުސްތަޤްބަލް ކަމުގައިވާ ކުޑަކުދިން މިހާރު “ޖެހިފައިވާ ދަލުން” ސަލާމަތްކުރާން ޖެހިއްޖެއެވެ. މިކަމުގައި ރައްޔިތުންގެ މަޖިލީހުގެ ދައުރު ވަރަށް ބޮޑެވެ.