ހ. މިޓާޒް ގޭގެ ފުރާޅު މައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު (21އ)ގެ މައްސަލައިގައި ތަހުގީގަށް އޭނާގެ ބަޔާން ވީހާވެސް އަވަހަށް ނަގަން ބޭނުންވާ ކަމަށް މޯލްޑިވްސް ޕޮލިސް ސަރވިސްއިން މިއަދު ހާމަކޮށްފިއެވެ. ފުލުހުން ބުނީ، ޔުމްނުގެ ސިއްހީ ހާލަތުގެ ސަބަބުން މިހާތަނަށް އެކަން ވަނީ ނުކުރެވިއެވެ.
ފުލުހުންގެ ފަރާތުން މީޑިއާތަކަށް ފޮނުވި މެސެޖެއްގައި ބުނެފައިވަނީ، މި މައްސަލައިގައި ޔުމްނުގެ ބަހެއް ހޯދުމަކީ ތަހުގީގަށް މުހިންމު ކަމެއްކަމަށް ދެކިގެން، އެ ފުރުސަތު ހޯދުމަށް ފުލުހުން ފުރަތަމަ ދުވަހުން ފެށިގެން މަސައްކަތްކޮށްފައިވާ ކަމަށެވެ.
"އޭނާގެ ސިއްހީ ހާލަތު ހުރި ގޮތުންނާއި އިތުރު އެކި ސަބަބުތަކާހުރެ، ސުވާލުކުރުމުގެ ފުރުސަތު މިހާތަނަށް ވަނީ ނުލިބި. އެކަން މަގުފަހިވިހާ އަވަހަކަށް ތަހުގީގުން އޭނާއާ ސުވާލުކުރަން ބޭނުންވޭ،" ޕޮލިސް މީޑިއާ އޮފިސަރު ވިދާޅުވިއެވެ.
Advertisement
ފުލުހުން ބުނީ މައްސަލައިގެ ތަހުގީގު މިހާރުވެސް ކުރިއަށްދާ ކަމަށާއި، އެ ކަމާ ގުޅިގެން ސުވާލުކުރަންޖެހޭ މީހުންނާ ސުވާލުކޮށް، އެ މީހުން ތަހުގީގަށްދޭ މައުލޫމާތުގެ ސައްހަކަން ކަށަވަރުކުރަން ތަހުގީގު ޓީމުން ގިނަ މަސައްކަތްތަކެއް ކުރަމުން އަންނަ ކަމަށެވެ.
މި މައްސަލައިގައި މިހާތަނަށް ފުލުހުން ހައްޔަރުކޮށްފައިވަނީ އެންމެ މީހެކެވެ. އަދި އިތުރު ބައެއްގެ ޕާސްޕޯޓު ވަނީ ހިފަހައްޓާފައެވެ. ފުލުހުން ބުނާގޮތުގައި މައްސަލައިގެ ތަހުގީގު ކުރިއަށްދަނީ ވަރަށް ފުޅާ ދާއިރާއެއްގައެވެ.
ފުލުހުން މި މައްސަލައިގައި އިތުރު މަޢުލޫމާތު ހާމަކުރާނީ ތަހުގީގަށް ބުރޫނާރާނެ ގޮތަކަށް ކަމަށް ބުނެފައިވެއެވެ. އަދި މައްސަލައާ ގުޅޭ އެންމެހައި ކަންކަން ބަލަމުންދާ ކަމަށާއި، ޤާނޫނީ އިމުގެ ތެރެއިން އަޅަންޖެހޭ ފިޔަވަޅުތައް އަޅަމުންދާނެ ކަމަށްވެސް ފުލުހުން ވަނީ ހާމަކޮށްފައެވެ.
