ތެލެސީމިއާ ސެންޓަރުގެ ޚިދުމަތް ހަރުދަނާކުރުމަށްޓަކައި އެ ސެންޓަރުގެ އިދާރީ ހިންގުމާއި ޚިދުމަތުގެ ގަޑިތަކަށް ބަދަލުގެނެސް، މާލޭ ގްރޫޕް އޮފް ހޮސްޕިޓަލްސްގެ ދަށަށް ބަދަލުކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ. މި މުހިންމު ނިންމުން ރައީސް އިޢުލާނުކުރެއްވީ "ރައްޔިތުންނާ އެކު" ސިލްސިލާ ޕޮޑްކާސްޓްގެ ފަސްވަނަ އެޕިސޯޑްގައި ވާހަކަފުޅުދައްކަވަމުންނެވެ.
ކުރިން ތެލެސީމިއާ ސެންޓަރަކީ އަޅާނުލައި ދޫކޮށްލާފައިވާ ތަނެއްގެ ގޮތުގައި ފާހަގަކުރެވިފައިވީ ނަމަވެސް، މި އައު ބަދަލާއެކު އެ ތަނުގެ ޚިދުމަތްތައް އިތުރަށް ހަރުދަނާވެގެންދާނެއެވެ.
ރައީސް ވިދާޅުވިގޮތުގައި، ހޮސްޕިޓަލެއްގެ ގޮތުގައި ތެލެސީމިއާ ސެންޓަރު ހިންގުމަކީ ވަރަށް މުހިންމު ކަމެކެވެ. އަދި އެންމެ ގިނަވެގެން ކުރިއަށް އޮތް ދެ ހަފުތާގެ ތެރޭގައި، މޯލްޑިވިއަން ބްލަޑް ސަރވިސަސް (އެމްބީއެސް) ގެ ހިންގުމާ މާލޭ ގްރޫޕް އޮފް ހޮސްޕިޓަލްސްގެ ފަރާތުން ހަވާލުވާނެ ކަމުގައި އެމަނިކުފާނު ވިދާޅުވިއެވެ.
Advertisement
މި ބަދަލުގެ ސަބަބުން ލިބޭނެ ފައިދާތަކުގެ ތެރޭގައި، ސްޕެޝަލިސްޓް ޑޮކްޓަރުންގެ އެހީގައި ތެލެސީމިއާ ކުދިންގެ އެކިއެކި މައްސަލަތަކާއި ދަތިތަކަށް ހައްލު ލިބިގެންދިއުން ހިމެނެއެވެ. މީގެ އިތުރުން، ރާއްޖޭގެ އަތޮޅުތަކުގައި ދެވޭ ޚިދުމަތްތައްވެސް ހިނގަމުންދާނީ މާލޭ ގްރޫޕް އޮފް ހޮސްޕިޓަލްސްގެ ދަށުންނެވެ. ތެލެސީމިއާ ސެންޓަރު ހުޅުމާލޭ އޮރެންޖު ހިޔާއަށް ބަދަލުވެގެންދިއުމާއެކު، ހުޅުމާލޭގައި ހުރި މާލޭ ހޮސްޕިޓަލްސް ގްރޫޕުގެ ހޮސްޕިޓަލުން އެތަނުގެ ހިންގުމުގައި މުހިންމު ދައުރެއް އަދާކުރާނެ ކަމަށް ރައީސް ފާހަގަކުރެއްވިއެވެ.
ދިވެހިރާއްޖެއަކީ އާބާދީގެ ނިސްބަތުން ބަލާއިރު، ތެލެސީމިއާ ކުދިންގެ އިންސައްތަ އެންމެ މަތީ އެއް ގައުމެވެ. ރާއްޖޭގެ އާބާދީގެ ކޮންމެ 18 މީހުންކުރެ އެކަކީ ތެލެސީމިއާ ވާރުތަވުމުގެ ފުރުސަތު އޮތް ކެރިއަރެކެވެ.
