ރޭ މެންދަމު އިންޑިއާއިން "އޮޕަރޭޝަން ސިންދޫރު" ގެ ނަމުގައި ޕާކިސްތާނާއި ޕާކިސްތާނުން ހިންގާ ކަޝްމީރުގެ ނުވަ ތަނަކަށް ހަމަލާދީފިއެވެ. މި އޮޕަރޭޝަނަކީ އޭޕްރީލް 22 ވަނަ ދުވަހު ހިންދޫ 26 ފަތުރުވެރިން މަރުވި ޕަހަލްގަމް ހަމަލާއާއި ގުޅިގެން ރައްދުގައި ދިން ޙަމަލާއެކެވެ.

^{އިންޑިއާއިން ދިން ހަމަލާގައި ޕާކިސްތާނުގެ ކަޝްމީރުގެ އިމާރާތަކަށް ލިބިފައިވާ ގެއްލުންތަކެއް.}

އިންޑިއާއިން ބުނެފައިވާ ގޮތުގައި މި ހަމަލާތައް އަމާޒުކޮށްފައިވަނީ ލަޝްކަރެ ތައިބާ އަދި ޖައިޝޭ މުހައްމަދު ފަދަ ގްރޫޕްތަކާ ގުޅުންހުރި ޓެރަރިސްޓް އިންފްރާސްޓްރަކްޗަރ ނައްތާލުމަށެވެ. އަދި ޕާކިސްތާނުގެ އެއްވެސް އަސްކަރީ މަރުކަޒަކަށް އަމާޒުކޮށްފައި ނުވާ ކަމަށް އިންޑިއާއިން ބުނެފައިވެއެވެ.

ޕާކިސްތާނުގެ އިދާރާތަކުން ބުނާ ގޮތުގައި، އިންޑިއާގެ ހަމަލާތަކުގައި މަދުވެގެން އާންމުންގެ 9 މީހުން މަރުވެފައިވެއެވެ. މީގެ ތެރޭގައި ކުޑަކުއްޖަކު ހިމެނެއެވެ. އަދި 38 މީހަކު ޒަޚަމްވެފައިވެއެވެ. ބަހާވަލްޕޫރުގެ މިސްކިތަކަށްވެސް ހަމަލާ އަމާޒުވެފައިވެއެވެ.

^{އިންޑިއާއިން ދިން ހަމަލާގައި މިސްކިތަށް ލިބިފައިވާ ގެއްލުންތައް.}

ބަދަލު ހިފުމުގެ ގޮތުން ޕާކިސްތާނުން ވަނީ އިންޑިއާގެ ހަނގުރާމަމަތީ 5 ޖެޓާއި ޑްރޯނެއް ވައްޓާލާފައެވެ. މީގެ އިތުރުން، ޕާކިސްތާނުން ދިން ހަމަލާއެއްގައި އިންޑިއާގެ ކަޝްމީރު ފަޅީގެ ތިން މީހުން މަރުވެފައިވެއެވެ.

މި ހާދިސާތަކާ ގުޅިގެން ނިއުކްލިއާ ހަތިޔާރު އެޅި ދެ ޤައުމުގެ މެދުގައި ނުތަނަވަސްކަން އިތުރުވެފައިވެއެވެ. ވައިގެ ސަރަޙައްދު ބަންދުވުމާއި ފްލައިޓްތައް ކެންސަލްވަމުންދާ ކަމުގެ ރިޕޯޓްތައް ދަނީ ލިބެމުންނެވެ.

މިހާރު ދެ ޤައުމު ވެސް އޮތީ ހައި އެލާޓްގައެވެ.