އިންޑިއާއާއެކު ހަދާފައިވާ އެއްބަސްވުންތަކުގެ ތެރެއިން ރާއްޖޭގެ ސިޔާދަތާއި މިނިވަންކަމަށް އަސަރުކުރާފަދަ މާއްދާތައް އިސްލާހުކުރުމުގެ މަސައްކަތް ކުރިއަށްދާ ކަމަށް ޑިފެންސް މިނިސްޓަރު ޣައްސާން މައުމޫން ވިދާޅުވެއްޖެއެވެ. މިނިސްޓަރު މިހެން ވިދާޅުވީ މިއަދު ރައްޔިތުންގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ.

މިނިސްޓަރު ޣައްސާން ވިދާޅުވިގޮތުގައި، އިންޑިއާއާއެކު ވެފައިވާ އެއްބަސްވުންތަކުގެ ތެރެއިން ޑިފެންސް މިނިސްޓްރީގެ ދަށުން އޮތީ ހަތަރު އެއްބަސްވުމެކެވެ. އޭގެ ތެރޭގައި އުތުރު ތިލަފަޅުގައި އަސްކަރީ މަރުކަޒެއް ގާއިމުކުރުމާ ގުޅޭ އެއްބަސްވުން ހިމެނެއެވެ. މިނިސްޓަރު އިތުރަށް ވިދާޅުވީ، މި އެއްބަސްވުންތަކުގައި ހުރި ކަންބޮޑުވުންތައް ހައްލުކުރުމަށް މަސައްކަތްކުރަމުންދާ ކަމަށެވެ.

ދޭދޭ ޤައުމުތަކުގެ މެދުގައި ހަދާ ސަލާމަތީ ކަންކަމާއި ގުޅުން އޮންނަ އެއްބަސްވުންތަކަކީ ދުނިޔޭގެ އެއްވެސް ޤައުމަކުން ހާމަނުކުރާ އިންޓެލިޖެންސް މުހިންމު މަޢުލޫމާތު ހިމެނޭ އެއްބަސްވުންތައް ކަމަށް ވާތީ، މިނިސްޓަރު ޣައްސާން ވެސް އެ އެއްބަސްވުންތަކާބެހޭ ސަލާމަތީ ކަންތަކާގުޅޭ މަޢުލޫމާތެއް ހާމައެއް ނުކުރައްވައެވެ. ވިދާޅުވީ، އެއީ "ކޮންފިޑެންޝަލިޓީ ކްލޯޒް" ގެ ސަބަބުން ކަމަށެވެ. ނަމަވެސް، ރައްޔިތުންގެ މަޖިލީހުގެ 241 ކޮމިޓީން އެދިއްޖެނަމަ، އެއްބަސްވުންތައް ހާމަކުރެއްވޭނެ ކަމަށް މިނިސްޓަރު ވިދާޅުވިއެވެ.

ރައީސް ޑރ. މުޙައްމަދު މުޢިއްޒު ވެސް މިދާކަށް ދުވަހު ވިދާޅުވެފައި ވަނީ، ހައިޑްރޯގްރެފިކް އެއްބަސްވުން ފިޔަވައި އެހެން އެއްބަސްވުންތަކުގައި ހުރި ކަންބޮޑުވުންތައް މި ސަރުކާރު އައުމަށްފަހު ހައްލުކުރެވިފައިވާ ކަމަށެވެ. އަދި އެއްބަސްވުންތަކުގެ މާއްދާތައް ހާމަކުރުމަށް ދެ ގައުމުގެ މެދުގައި މަޝްވަރާތައް ކުރިއަށްދާ ކަމަށާއި، އެ މަޢުލޫމާތު މީޑިއާއާ ހިއްސާކުރެވޭނެ ކަމަށް އުންމީދުކުރައްވާ ކަމަށް ރައީސް ވިދާޅުވިއެވެ.