ދާޚިލީ ހަނގުރާމައިގެ ތެރެއަށް ވެއްޓިފައިވާ ދެކުނު ސޫދާނުގެ އޯލްޑް ފަންގަކްގައި ހުންނަ މެޑިސިން ސަންސް ފްރޮންޓިއަރސް (އެމްއެސްއެފް) އިން ހިންގާ ހޮސްޕިޓަލަކަށް އިއްޔެ ހެނދުނުގެ ވަގުތެއްގައި ބޮން އަޅައި، މަދުވެގެން ހަތް މީހުން މަރުވެ، 20 އަށް ވުރެ ގިނަ މީހުން ޒަޚަމް ވެއްޖެއެވެ.
ޚަބަރުތސއް ބުނާ ގޮތުގައި ހަނގުރާމަމަތީ ދެ ހެލިކޮޕްޓަރު ބައިވެރިވި މި ހަމަލާގައި އެ ފެސިލިޓީގެ ބޭސްފިހާރަ ހަލާކުވެ، ސިއްހީ ސާމާނު ނައްތާލާފައިވާއިރު، އެ ހޮސްޕިޓަލަކީ އެ ސަރަހައްދުގައި ހުރި ހަމައެކަނި ފަންކްޝަނަލް ހޮސްޕިޓަލް ކަމަށް އަލްޖަޒީރާއިން ބުނެއެވެ.
މި ހަމަލާ ދީފައި ވަނީ އިއްޔެ ވަރަށް ފަތިހު 4:30 ހާއިރު ކަމަށާއި، ހޮސްޕިޓަލަށް ބޮން އެޅުމުގެ ކުރިން ގާތްގަނޑަކަށް 30 މިނެޓް ވަންދެން އެ ސަރަހައްދަށް ބޮން އެޅި ކަމަށް ވެސް މަސްދަރުތަކުން ބުނެއެވެ.
Advertisement
އެމްއެސްއެފް އިން މި ހަމަލާ ކުށްވެރިކޮށްފައިވާއިރު، ސިއްހީ ހިދުމަތް ލިބުން މަދު އެ ސަރަޙައްދުގައި މިހާރު ވެސް އެ ހޮސްޕިޓަލުން 110،000 އަށް ވުރެ ގިނަ މީހުންނަށް ހިދުމަތް ދިން ކަމަށް ފާހަގަކޮށްފައި ވެއެވެ.
މި ހަމަލާދިން މީހުންމއަދި ދެނެގަނެވިފައި ނުވާއިރު، އެކަމުގެ ޒިންމާ އެއްވެސް ޖަމާއަތަކުން އުފުލާފައެއް ނުވެއެވެ.
