ރާއްޖޭގެ އަސްކަރިއްޔާއަށް ތުރުކީ ކުންފުންޏެއް މެދުވެރިކޮށް މިސައިލް ގެނައުމަށް މަސައްކަތް ކުރާކަމަށް ދެކެވެމުންދާ ވާހަކަތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދޮގުކުރައްވައިފިއެވެ.
އިއްޔެއިން ފެށިގެން ރޭ ދަންވަންދެން ބޭއްވި ނޫސްވެރިންގެ ބައްދަލުވުމުގައި ނޫސްވެރިއެއްގެ ސުވާލަކަށް ޖަވާބު ދެއްވަމުން ރައީސް ވިދާޅުވީ، މަނަވަރުގައި ބޭނުންކުރުމަށް މިސައިލް ގެންނަން އުޅޭކަމަށް ދެކެވެމުންދާ ވާހަކަތަކަކީ ހަގީގަތެއް ނެތް ވާހަކަތަކެއް ކަމަށެވެ.
"އެއީ ހަގީގަތެއް ނެތް ވާހަކަތަކެއް. މިސައިލެއް ގަންނަން އެއްވެސް މަސައްކަތެއް ނުކުރަން. އަދި އެފަދަ އާލާތެއް ހޯދަން ވެސް ނޫޅޭ،" ރައީސް ވިދާޅުވިއެވެ.
Advertisement
ރައީސް ވިދާޅުވީ، ތުރުކީން ރާއްޖެއަށް ހަދިޔާކުރި މަނަވަރަކީ ރާއްޖޭގައި މިހާތަނަށް ނެތް ވަރުގެ ބޮޑު އުޅަނދެއް ކަމަށާއި، އެ އުޅަނދަށް އެއްވެސް ހަރަދެއް ކުރަން ނުޖެހޭ ކަމަށެވެ. އަދި ތުރުކީވިލާތުން ރާއްޖެއަށް ހަދިޔާކުރާ އެ އުޅަނދުގައި މިސައިލެއް ވެސް ނެތް ކަމަށް ރައީސް ވިދާޅުވިއެވެ.
