ސޮނެވާފުށީ ރިސޯޓުގެ މުވައްޒަފުންތަކެއް ޓޫރިސްޓުންނާ އެކު، ބ. ނެލިވަރު ފިނޮޅު ސަރަހައްދަށް ގަވާއިދާ ހިލާފަށް ވަދެ، އެ ސަރަހައްދުގައި ގަވާއިދާ ހިލާފު އަމަލުތަކެއް ހިންގާފައި ވާތީ 448,375. ރުފިޔާއިން ޖޫރިމަނާކޮށްފި އެވެ.
އީޕީއޭއިން މިއަދު ނެރުނު ނޫސްބަޔާނެއްގައި ބުނީ ސޮނެވާފުށީގެ މުވައްޒަފުންތަކެއް މިދިޔަ ޑިސެމްބަރު މަހުގެ 18 ވަނަ ދުވަހު ޓޫރިސްޓުންނާ އެކު، ބ. ނެލިވަރު ސަރަހައްދަށް ގަވާއިދާ ހިލާފަށް ވަދެ، އެ ސަރަޙައްދުގައި ގަވާއިދާ ހިލާފު އަމަލުތަކެއް ކުރިއަށް ގެންގޮސްފައިވާ ކަމުގެ މައުލޫމާތު އެ އެޖެންސީއަށް ލިބުމާ ގުޅިގެން އެ މައްސަލަ ބަލާފައިވާ ކަމަށެވެ.
އެ މައްސަލައާ ގުޅިގެން އެ އެޖެންސީން އެއްކުރި މައުލޫމާތުންނާއި ބ. އަތޮޅު ބަޔޯސްފިޔާ ރިޒާވް އޮފީސްގެ ފަރާތުންނާއި ފުލުހުންގެ ފަރާތުން އެ އެޖެންސީ އަށް ހިއްސާކޮށްފައިވާ ހާދިސާގެ ރިޕޯޓަށް ބަލައި، ފާހަގަކުރެވުނު ބައެއް ކަންކަން އީޕީއޭ އިން ވަނީ އެ ނޫސްބަޔާނުގައި ފާހަގަކޮށްފަ އެވެ. އެއީ؛
- ނެލިވަރު ސަރަހައްދަކީ ހިމާޔަތްކޮށްފައިވާ ސަރަހައްދެއް ކަމާއި އެ ސަރަހައްދަށް ވަދެ އުޅުމުގައި ގަވާއިދާ ހިލާފު އަމަލުތަކެއް ކުރިއަށް ގެންގޮސްފި ނަމަ ގާނޫނީ ފިޔަވަޅު އެޅޭނެކަން ބަޔާންކޮށް ސޮނެވާފުއްޓަށް މިދިޔަ އަހަރުގެ ޖޫން މަހުގެ 11 ވަނަ ދުވަހު ސިޓީއެއް އީޕީއޭ އިން ފޮނުވާފައިވޭ.
- ނަމަވެސް، މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހު ސޮނެވާފުށީގެ މުވައްޒަފުންތަކެއް ޓޫރިސްޓުންނާ އެކު، ޖުމްލަ 10 މީހުން ނެލިވަރު ސަރަހައްދަށް، އެ ދުވަހުގެ އިރުއޮއްސި 6:00 ގެ ފަހުން ވަދެފައިވޭ.
- ސޮނެވާފުށީގެ މުވައްޒަފުންތަކެއް ޓޫރިސްޓުންނާ އެކު، ނެލިވަރު ސަރަހައްދަށް ވަދެފައި ވަނީ ގަވާއިދާ ހިލާފަށް، ބ. އަތޮޅު ބަޔޯސްފިޔާ ރިޒާވް އޮފީސްގެ ހުއްދަ ހޯދުމެއް ނެތި.
އީޕީއޭއިން ބުނީ އެ މީހުން އެ ސަރަހައްދަށް ވަދެ، އެ ސަރަހައްދުގައި ކުރުން މަނާކަމަށް ބަޔާންކޮށްފައިވާ ކަންކަމުގެ ތެރެއިން، އަލިވާގޮތަށް ރޭގަނޑު އެ ސަރަހައްދު ދިއްލުމާއި އެތަނުގެ ދިރުންތަކުގެ އާދަކާދައަށް ބުރޫއަރާގޮތަށް އަޑުގަދަވާފަދައިން އަމަލުކޮށްފައިވުމާ އަދި އަލިފާން ރޯކުރުމާއި އަލިފާން ގެންގުޅެފައިވާކަން ފާހަގަކުރެވިފައިވާ ކަމަށެވެ.
ބ. އަތޮޅުގެ ބަޔޯސްފިއާ ރިޒާވް އޮފީސްގެ މަންދޫބުންނާއި ފުލުހުން މިދިޔަ ޑިސެމްބަރު މަހުގެ 18 ވަނަ ދުވަހު ނެލިވަރަށް ގޮސް، ސޮނެވާފުށީގެ މުވައްޒަފުން ޓޫރިސްޓުންނާ އެކު، އެ ސަރަހައްދު ދޫކޮށްދިއުމަށް އެންގި އެންގުމާއި ހިލާފުވެ، އަދި އެ ފަރާތްތަކަށް އެއްބާރުލުން ދީފައި ނުވާ ކަމަށް ވެސް އީޕީއޭ އިން ބުންޏެވެ.
އެމީހުން އެ ސަރަހައްދުން ގޮސްފައި ވަނީ އެ ސަރަހައްދުގައި ކުރިއަށް ގެންދިއުމަށް ރާވާފައިވާ ކަންތައްތައްކޮށް ނިންމުމަށް ފަހުގައި ކަމަށް އީޕީއޭ އިން ބުންޏެވެ.
އެހެންވެ، ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނާއި ގުދުރަތީ ގޮތުގައި ނުވަތަ ތަބީއީ ގޮތުގައި ރައްކާތެރިކޮށް ދަމަހައްޓާ ތަންތަނާ ބެހޭ ގަވާއިދުގެ ދަށުން އެ ރިސޯޓު 448,375ރ. އިން ޖޫރިމަނާކޮށްފައިވާ ކަމަށް އީޕީއޭގެ އިއުލާނުގައި ބުންޏެވެ.
މި މަހުގެ 23 ވަނަ ދުވަހުން ފެށިގެން 30 ދުވަހުގެ ތެރޭގައި ޖޫރިމަނާގެ ފައިސާ އީޕީއޭއަށް ދައްކަން ސޮނެވާފުށީ ރިސޯޓަށް ވަނީ އަންގައިފަ އެވެ.
