އީރާނުގެ އެންމެ ބޮޑު ވިޔަފާރި ބަނދަރު ކަމުގައިވާ ޝަހީދު ރަޖާއީ ބަނދަރުގައި އިއްޔެ ގޮވި ބާރުގަދަ ގޮވުމެއްގައި މަދުވެގެން 14 މީހުން މަރުވެ، 750 މީހުންނަށް އަނިޔާވެއްޖެ ކަމަށް އެ ގައުމުގެ އިސްވެރިން މަޢުލޫމާތު ދީފިއެވެ.
ފާހަގަލޮށްލަން ޖެހޭ މުހިންމު ކަމަކީ މި ހާދިސާ ހިނގާފައި މިވަނީ އިސްރާއީލުގެ އިންޓެލިޖެންސުން އީރާނުގެ ހިޒްބުالله އަށް އަމާޒުކޮށް ލުބުނާނުގައި ޕޭޖަރުތަކެއް ގޮއްވާލިތާ އަހަރެއް ވީތަނާއެވެ. ސެޕްޓެމްބަރު 2024 ގައި ލުބުނާނާއި ސީރިއާގައި ޕޭޖަރުތައް ގޮއްވާލީ ހިޒްބުاللهގެ މުވާސަލާތީ ނެޓްވޯކަށް އަމާޒުކޮށްގެން މޮސާދާއި އައިޑީއެފް އިން ހިންގި ސިއްރު އޮޕަރޭޝަނެއްގައެވެ. ގޯލްޑް އެޕޯލޯ އާރް-924 ޕޭޖަރސްގެ ނަމުގައި އުފައްދާފައިވާ މި ޑިވައިސްތަކަކީ ހަންގޭރީގެ ބީއޭސީ ކޮންސަލްޓިންގެ ލައިސަންސްގެ ދަށުން އުފައްދާފައިވާ ޑިވައިސްތަކެކެވެ. ލުބުނާނަށް އެތަކެތި ދިޔައިރު އޭގެތެރެއަށް ވަނީ ގޮވާތަކެތި އަޅާފައެވެ.
Advertisement
އީރާނުގެ ބަނދަރުގައި އިއްޔެ ކޮންޓެއިނަރުތަކެއް ގޮވައި ހިނގި ހާދިސާގެ ތެރެއިން / ފޮޓޯ: ބީބީސީ
އިއްޔެ ގޮވުން ގޮވާފައި ވަނީ ބަންދަރު އައްބާސް ސިޓީ ކައިރީގައި އޮންނަ މި ބަނދަރުގައެވެ. މި ގޮވުމާއެކު ކައިރީގައި ހުރި އިމާރާތްތަކުގެ ކުޑަދޮރުތަކާއި ފުރާޅުތައް ހަލާކުވެ، ގިނަ އަދަދެއްގެ ވެހިކަލްތައް ވަނީ ހަލާކުވެފައެވެ. އަދި މި ގޮވުމުގެ އަސަރު 50 ކިލޯމީޓަރު ދުރުގައި ތިބި މީހުންނަށްވެސް އިހުސާސްކުރެވުނު ކަމަށް މަސްދަރުތަކުން ބުނެފައިވެއެވެ.
ގޮވައިގެން އުޅެނީ އީރާނުގެ މިސައިލް އުފެއްދުމަށް ބޭނުންވާ ސޯޑިއަމް ޕާކްލޮރޭޓް ކޮންޓެއިނާތަކެއްގަވެ. މިއީ ދެ އުޅަނދެއްގައި ޗައިނާއިން ގެނެސްފައިވާ ކޮންޓެއިނާތަކެއް ކަމަށް ބައެއް މަސްދަރުތައް ބުނެއެވެ.
އީރާނުގެ ރައީސް މަސްއޫދު ޕެޒެޝްކިއަންގެ ސަރުކާރުން މި މައްސަލަ ތަޙުޤީޤު ކުރަމުން ދާއިރު ކޮންޓެއިނާތައް އީރާނާއި ހަމަޔަށް އައުމުގެ ކުރިން އޭގައިވާ ތަކެތި ބަދަލުވެފައި ވޭތޯ، ނުވަތަ އެހެން ގައުމަކަށް އެ ކޮންޓެއިނާ ވަދެފައި ވޭތޯ މިހާރު ދަނީ ބަލަމުންނެވެ.
މި ހާދިސާ ހިނގި ސަބަބު އަދި ދެނެގަނެވިފައި ނުވާއިރު، މި ހާދިސާ ހިނގީ އީރާނުގެ ނިއުކްލިއަރ ޕްރޮގްރާމާ ގުޅޭގޮތުން އެމެރިކާއާއެކު ކުރިއަށްދާ މަޝްވަރާތަކުގެ އެންމެ ފަހުގެ ބުރު ކުރިއަށްދަނިކޮށެވެ.
