މިދިޔަ ހުކުރުވިލޭރޭ ހ. މިތާޒްގޭގެ ފުރާޅުމައްޗަށް 21 އަހަރުގެ އަންހެނަކު ވެއްޓުނު ހާދިސާއާ ގުޅިގެން، އެ މައްސަލައިގައި ހިމެނޭ މީހަކު ރާއްޖެއިން ބޭރަށް ފުރާފައިވާ ކަމަށް ބުނެ މީސްމީޑިއާގައި ދައުރުވަމުންދާ ވާހަކަތައް ފުލުހުންގެ ޚިދުމަތުން ދޮގުކޮށްފިއެވެ.

ފުލުހުން ހިއްސާކުރި މަޢުލޫމާތުގައި ބުނެފައިވަނީ، މި ހާދިސާއާ ގުޅިގެން ފުރުން މަނާކޮށްފައިވާ އަންހެނަކު މެލޭޝިއާއަށް ފުރާފައިވާ ކަމަށް ސޯޝަލް މީޑިއާގައި ދައުރުވަމުންދާ ވާހަކަތަކަކީ ހަގީގަތާ ޚިލާފު ވާހަކަތަކެއް ކަމަށެވެ.

މި ހާދިސާ ހިނގާފައިވަނީ މިމަހުގެ 18 ވަނަ ދުވަހުއެވެ. ހެންވޭރު ފެންޓެނޯއީ ގެއާ އިންވެގެންހުރި ގުދަނުގެ ފުރާޅުމައްޗަށް އަންހެނަކު ވެއްޓިފައިވާ ކަމަށް އާންމު ފަރާތަކުން ރިޕޯޓުކޮށްފައިވަނީ އެދުވަހުގެ ހެނދުނު 7:30 ހާއިރުއެވެ. އެމްއެންޑީއެފްގެ އެހީއާއެކު 8 ޖަހާއިރު އޭނާ ވަނީ ހޮސްޕިޓަލަށް ގެންގޮސްފައެވެ.

ފުލުހުން ބުނާ ގޮތުގައި އަންހެން މީހާ ވެއްޓުނު ވަގުތު އެ އިމާރާތުގައި އޭނާއާއެކު އެހެން މީހަކު ހުރިއެވެ. އެއީ ގ. އެރިއަދޫ، އުމުރުން 21 އަހަރުގެ ރައުދު އަހުމަދު ޒިލާލްއެވެ. ރައުދުއާއި ވެއްޓުނު އަންހެން މީހާ އެ ގޭގައި އުޅޭ މަންޒަރު ފުލުހުން އާންމުކުރި ސީސީޓީވީ ފުޓޭޖްތަކުން ފެނިފައިވެއެވެ. ރޭ 18:20 ހާއިރު ރައުދު ވަނީ ކޯޓު އަމުރެއްގެ ދަށުން ހައްޔަރުކޮށްފައެވެ.

ފުލުހުން އިތުރަށް ހާމަކޮށްފައިވާ ގޮތުގައި ރައުދުއާއި ވެއްޓުނު އަންހެން މީހާ އެރޭ އިތުރު ދެ ގެއަކަށް ގޮސްފައިވެއެވެ. އަދި އެ ދެ މީހުންނާއެކު އެ ރޭ އިތުރު ބަޔަކުވެސް އުޅުނު ކަމަށް ފުލުހުން ބުނެފައިވެއެވެ. މި ހާދިސާއާ ގުޅުންހުރި އެންމެންގެ ބަޔާން ނަގައި، އެ މީހުންނަށް ރާއްޖެއިން ބޭރަށް ނުދެވޭގޮތަށް ޕާސްޕޯޓު ހިފަހައްޓާފައިވާ ކަމަށްވެސް ފުލުހުން ވިދާޅުވިއެވެ.

މި މައްސަލައިގައި ރައުދު ހައްޔަރުކުރުމުގެ އިތުރުން ވެއްޓުނު 21 އަހަރުގެ އަންހެން މީހާ ހިމެނޭހެން 7 މީހެއްގެ ފޯނުވެސް ކޯޓު އަމުރެއްގެ ދަށުން ފުލުހުން ވަނީ ހިފަހައްޓާފައެވެ.

އަދި މި މައްސަލައާއި ގުޅިގެން އަންހެން މީހާ އެރޭ ހަރަކާތްތެރިވިކަމަށް ބެލެވޭ މއ. މާންދޫގެ ދެކުނުގޭގެ ޓެރަސްއާއި އެގޭ ދެވަނަ އަދި ހަތަރުވަނަ ފަންގިފިލާ އަދި ގ. ކަށިވެލިގޭގެ ތިންވަނަ ފަންގިފިލާ ބަލައި ފާސްކޮށްފައިވާ ކަމަށްވެސް ފުލުހުން ވިދާޅުވިއެވެ.

މި މައްސަލައިގައި ހިމެނޭ އެއްވެސް ފަރާތަކުން ރާއްޖެއިން ބޭރަށް ފުރާފައި ނުވާކަމަށް ފުލުހުން ވަނީ ކަށަވަރުކޮށްދީފައެވެ.