.އެފްއޭއެމްގެ މިހާރުގެ އަސާސީ ގަވާއިދާ އެއްގޮތަށް، އެ އެސޯސިއޭޝަނުގެ ކޮންގްރެސްގައި ރާއްޖޭގެ 9 ޒޯނަށް ފުރުޞަތު ދިނުމަށް ސޭވް އެފްއޭއެމުން ގޮވާލައިފިއެވެ. ސޭވް އެފްއޭއެމުން މިގޮތަށް ގޮވައިލީ އެފްއޭއެމްގެ ނޯމަލައިޒޭޝަން ކޮމިޓީއާއެކު ބޭއްވުނު ބައްދަލުވުމަކަށްފަހުގައެވެ.
ސޭވް އެފްއޭއެމްގެ ފަރާތުން ބައްދަލުވުމުގައި ބައިވެރިވި، އެފްއޭއެމްގެ ކުރީގެ ސެކްރެޓަރީ ޖެނެރަލް ޝާހު އިސްމާއީލް ވިދާޅުވީ 2016 ގައި ފާސްކުރެވުނު އަސާސީ ގަވާއިދުގެ ދަށުން ކޮންގްރެސްގައި 44 މަންދޫބުން ތަމްސީލުކުރަންޖެހޭ ކަމަށެވެ. އޭނާ ފާހަގަކުރެއްވި ގޮތުގައި، 2020 ގައި ދިވެހި ކޮޕީއަށް ގެނެވުނު ބަދަލާ ނުލައި، ފީފާގެ ކުރިމަތީގައި ސައްހަ ގަވާއިދަކީ އިނގިރޭސި ގަވާއިދެވެ.
ފުޓްބޯޅައިގެ މައްސަލަތަކަށް ފާޑުކިޔާ ހާމިދު އަބްދުލް ޣަފޫރު ވިދާޅުވެފައިވަނީ 2020 ގައި ފާސްކުރެވުނު ގަވާއިދުގެ އިނގިރޭސި ތަރުޖަމާ އޭއެފްސީގެ ވެބްސައިޓުގައި ފެންނަން ހުރި ނަމަވެސް، އެއީ އޭއެފްސީން ފާސްކޮށްފައިވާ އެއްޗެއްކަން ޔަޤީންނުވާ ކަމަށެވެ. އަދި އެ ތަރުޖަމާގައިވެސް ރާއްޖޭގެ 9 ޒޯނުގެ ތަމްސީލު އޮންނަންޖެހޭނެ ކަމަށް ބަޔާންކޮށްފައިވާ ކަމަށް އޭނާ ފާހަގަކުރެއްވިއެވެ.
އެފްއޭއެމްގެ ނޯމަލައިޒޭޝަން ކޮމިޓީން އަންނަ މަހު ބާއްވަން ރާވާފައިވާ ކޮންގްރެސްގައި އަސާސީ ގަވާއިދު އިޞްލާޙުކުރުމަށް ހަމަޖެހިފައިވެއެވެ. މިކަމާ ގުޅިގެން ޓީސީ ސްޕޯޓްސް ކްލަބުން ވަނީ އިޞްލާޙުތަކެއް ހުށަހަޅާފައެވެ. މި އިޞްލާޙުތަކުގައި ހިމެނެނީ ރާއްޖެ 4 ޒޯނުގެ ސަބް އެސޯސިއޭޝަންތަކަކަށް ބަހާލުމާއި، 2 އަހަރުތެރޭ އެ 4 ޒޯނުގެ މެދުގައި ލީގު ފޯމެޓެއް އެކުލަވާލުމެވެ.
މި މައްސަލައިގައި ސޭވް އެފްއޭއެމުން ގޮވާލާފައިވަނީ އަސާސީ ގަވާއިދާ އެއްގޮތަށް ކޮންގްރެސް ބޭއްވުމަށާއި، ރާއްޖޭގެ 9 ޒޯނުގެ ތަމްސީލު ކޮންގްރެސްގައި ހިމެނުމަށެވެ.
