މަސްތުވާތަކެތި ބޭނުންކުރާ މީހުންނަށް ދޭ ފަރުވާގެ ނިޒާމުގައި ޖިސްމާނީ އަދި ނަފުސާނީ ދުޅަހެޔޮކަމުގެ ކަސްރަތުތައް ހިމެނުމާ ގުޅޭގޮތުން ނެޝަނަލް ޑްރަގް އެޖެންސީ (އެންޑީއޭ) އިން އިންޑިއަން ކަލްޗަރަލް ސެންޓަރާ މަޝްވަރާކޮށްފިއެވެ.
މި މަޝްވަރާތަކުގައި ކްލައިންޓުންނަށް މަސްތުން ސާފުވުމަށް އެހީތެރިވުމުގެ ގޮތުން ކުރެވިދާނެ މަސައްކަތްތަކާމެދު މަޝްވަރާކުރެވުރެވުނު ކަމަށާއި ނަފުސާނީ އަދި ޖިސްމާނީ ދުޅަހެޔޮކަމުގެ ވަށައިޖެހޭ ފަރުވާގެ ނިޒާމެއް ގާއިމުކުރުމާމެދު ވާހަކަދެކެވުނު ކަމަށް އެން.ޑީ.އޭ. އިން ބުންޏެވެ.
Advertisement
އެންޑީއޭއިން އިތުރަށް ބުނި ގޮތުގައި ވޮލަންޓިއަރ ޕިއަރ ވޯކަރުންގެ ގޮތުގައި މަސައްކަތްކުރުމުގެ ފުރުސަތު މިހާރު ވަނީ ހުޅުވާލާފައެވެ.
މި ފުރުސަތު ހުޅުވާލާފައިވާ ތަންތަނުގެ ތެރޭގައި އެންޑީއޭ، ހިންމަފުށީ ޑްރަގް ޓްރީޓްމަންޓް ސެންޓަރު، ހުޅުމާލޭ ހާފްވޭހައުސް އަދި އެހެނިހެން އަތޮޅުތަކުގައި ގާއިމުކޮށްފައިވާ ފަރުވާދޭ މަރުކަޒުތައް ހިމެނެއެވެ.
މަސްތުވާތަކެތީގެ މައްސަލައަކީ ރާއްޖޭގައި އާންމު މައްސަލައަކަށްވެފައިވާއިރު، މިދިޔަ އަހަރުގެ އޮކްޓޯބަރު މަހުން ފެށިގެން 100 އަށްވުރެ ގިނަ މީހުންނަށް ފަރުވާގެ ފުރުސަތު ދީފައިވާ ކަމަށް އެންޑީއޭއިން ބުނެފައިވެއެވެ.
