ފްރާންސްގެ ސަރުކާރުން, އެ ޤައުމުގައި މަސައްކަތްކުރަމުންދިޔަ އަލްޖީރިއާގެ 12 ޑިޕްލޮމެޓުންނާއި ކޮންސިއުލަރ އޮފިޝަލުން އެ ޤައުމުން ބޭރުކޮށްލުމަށް މީގެ އިރުކޮޅެއްކުރިން ނިންމައިފިއެވެ.

ފްރާންސުން މިގޮތަށް ނިންމީ މީގެ ކުރިން އަލްޖީރިއާއިން ފުރާންސްގެ ޑިޕްލޮމެޓުންތަކެއް ބޭރުކޮށްލުމާއި ގުޅިގެންނެވެ.

އަލްޖީރިއާއިން ފްރެންޗް ޑިޕްލޮމެޓުން ބޭރުކޮށްލީ ފްރާންސްގައި ހުރި އަލްޖީރިއާގެ ކޮންސިއުލަރ މުވައްޒަފަކު ހައްޔަރުކުރުމާއި ގުޅިގެންނެވެ. އަލްޖަޒީރާއިން ކުރިން ބުނެފައިވާ ގޮތުގައި އެ މުވައްޒަފު ހައްޔަރުކޮށްފައިވަނީ މީހަކު ވަގަށްނެގުމުގެ މައްސަލައެއްގައި ތަޙުޤީޤުކުރުމަށްޓަކައެވެ.

ފްރާންސްގެ ސަރުކާރުން ވަނީ އަލްޖީރިއާގައި ހުރި އެ ޤައުމުގެ ސަފީރު އަނބުރާ ގެނައުމަށްވެސް ނިންމާފައެވެ. އެހެންކަމުން މި ދެޤައުމުގެ ދެމެދުގައި އޮތް ގުޅުން އިތުރަށް ގޯސްވާނެ ކަމަށް ބެލެވެއެވެ. މި ދެޤައުމަކީ ޒަމާނުއްސުރެ ވެސް މައްސަލަތައް އޮންނަ ދެޤައުމެވެ. އަލްޖީރިއާގެ މުއްސަނދިކަން ފޭރިގަތުމަށްޓަކައި ފުރާންސުން ވަނީ އަލްޖީރިއާގެ 1 މިލިއަން މީހުން މަރާލާފައެވެ. އެއީ 1954 އާއި 1962 އާއި ދެމެދުގައި ކުރި ހަނގުރާމަތަކުގައެވެ. ހަނބުރާމަ ނިމުނީ އަލްޖީރިއާއަށް މިނިވަންކަން ލިބި ފުރާންސްގެ 25000 ސިފައިން މަރުވުމަށްފަހުގައެވެ.