މިދިޔަ މަހު 20ގެ ނިޔަލަށް ދައުލަތަށް ލިބުނު އާމްދަނީ 8.8 ބިލިއަން ރުފިޔާއަށް އަރައި ދައުލަތުން ހަރަދުކުރި މިންވަރަށް ވުރެ ލިބުނު އާމްދަނީ ގިނަވެ، ބަޖެޓު ސާޕްލަސް ވެއްޖެ ކަމަށް ފިނޭންސް މިނިސްޓްރީން މިއަދު ބުނެފި އެވެ.
ފިނޭންސް މިނިސްޓްރީން "ސަރުކާރު" ވެބްސައިޓުގައި ބުނީ މިއަދު އާންމުކޮށްފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓުން ދައްކާ ގޮތުގައި، 20 މާޗުގެ ނިޔަލަށް ދައުލަތަށް ލިބުނު އާމްދަނީ އާއި ހިލޭ އެހީގެ ޖުމްލައަކީ 8.8 ބިލިއަން ރުފިޔާ ކަމަށެވެ. އަދި މިދިޔަ އަހަރު އެ މުއްދަތުގައި ލިބުނީ 8.0 ބިލިއަން ރުފިޔާ ކަމަށް މިނިސްޓްރީން ބުންޏެވެ.
އާމްދަނީ އިތުރުވެފައި ވަނީ މައިގަނޑު ގޮތެއްގައި ފަތުރުވެރިކަމުގެ ދާއިރާއިން ނެގޭ މުދަލާއި ހިދުމަތުގެ ޓެކްސްއިންނާއި އެއާޕޯޓް ތަރައްގީކުރުމަށް ނެގޭ ފީން ކަމަށް މިނިސްޓްރީން ބުންޏެވެ.
Advertisement
މިނިސްޓްރީން ބުނީ މި މުއްދަތުގައި ދައުލަތުގެ ހަރަދުގެ ގޮތުގައި ހިނގާފައި ވަނީ 7.6 ބިލިއަން ރުފިޔާ ކަމަށެވެ. މިދިޔަ އަހަރުގެ މި މުއްދަތުގައި ދައުލަތުގެ ހަރަދުގެ ގޮތުގައި 8.9 ބިލިއަން ރުފިޔާ ހޭދަވެފައިވާ ކަމަށް މިނިސްޓްރީން ބުންޏެވެ.
މި އަހަރުގެ ހަރަދުތަކަށް ބަލާއިރު، އެންމެ ބޮޑު އިތުރުވުމެއް އައިސްފައި ވަނީ މުވައްޒަފުންނަށް ހިނގާ ހަރަދާއި އާސަންދަ އާއި ސަބްސިޑީގެ ބައިންނެވެ.
މިނިސްޓްރީން ބުނި ގޮތުގައި، ދައުލަތުގެ ޖުމްލަ ހަރަދު މިދިޔަ އަހަރާ އަޅައިބަލާއިރު މި މުއްދަތުގައި ކުޑަ ނަމަވެސް، މި އަހަރުގެ ޖުމްލަ ބަޖެޓު ބޮޑުވެފައި ވަނީ ހަރަދުގެ ގޮތުގައި ނުހިމެނޭ ލޯނާއި އިންޓްރެސްޓަށް ކުރާ ހޭދަ ބޮޑުވެފައިވާތީ އެވެ. އޭގެ ތެރޭގައި މިދިޔަ މަހު ކާގިލް ފައިނޭންޝަލް ސާވިސަސް އިންޓަނޭޝަނަލްއަށް އަނބުރާ ދައްކާފައިވާ 100 މިލިއަން ޑޮލަރުގެ ލޯނާއި އިންޓްރެސްޓް ވެސް ހިމެނެ އެވެ.
ދައުލަތުގެ މާލީ ހިސާބުތަކުން ދައްކާ ގޮތުގައި، މި މުއްދަތުގެ އޯވަރޯލް ބަޖެޓް ބެލެންސްއަކީ ގާތްގަނޑަކަށް 1.2 ބިލިއަން ރުފިޔާގެ ސާޕްލަސްއެކެވެ. މިދިޔަ އަހަރު އެ މިންވަރު ހުރީ ޑެފިސިޓްގައި، ދައުލަތަށް ލިބުނު އާމްދަނީ އަށް ވުރެ ގާތްގަނޑަކަށް އެއް ބިލިއަން ރުފިޔާ ހަރަދުކުރެވިފައި ކަމަށް މިނިސްޓްރީން ބުންޏެވެ.
މިނިސްޓްރީން ބުނީ މިދިޔަ މަހުގެ 20ގެ ނިޔަލަށް މި އަހަރުގެ ބަޖެޓް ބޭނުންކުރެވިފައިވާ މިންވަރަށް ބަލާއިރު، އެންމެ ގިނައިން ހަރަދު ހިނގާފައިވާ އިދާރާތަކަކީ، ކޮންސްޓްރަކްޝަން މިނިސްޓްރީއަށް 441.8 މިލިއަން ރުފިޔާ އާއި އެޑިޔުކޭޝަން މިނިސްޓްރީއަށް 668.6 މިލިއަން ރުފިޔާ އަދި އެންސްޕާއަށް 883.8 މިލިއަން ރުފިޔާ ކަމަށެވެ.
