އައިޑީކާޑު ޕްރިންޓްކުރުމުގެ ހިދުމަތް އިތުރު ހަތަރު ރަށެއްގައި މި މަހު ފަށަން ނިންމައިފި އެވެ.
ހޯމް މިނިސްޓްރީން މިއަދު ބުނީ އައިޑީކާޑު ޕްރިންޓްކުރުމުގެ ހިދުމަތް އިތުރު ހަތަރު ރަށެއްގައި މި މަހު ފެށުމަށް ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު) އިން ތައްޔާރުވެފައިވާ ކަމަށެވެ.
އެ ރަށްތަކަކީ ށ. މިލަންދޫ, ށ. ފުނަދޫ, ނ. ވެލިދޫ އަދި މ. މުލީ އެވެ.
Advertisement
ޑީއެންއާރުން މިހާރު ވެސް އަންނަނީ ކައުންސިލްތަކާ ގުޅިގެން 15 ރަށެއްގައި އައިޑީ ކާޑު ޕްރިންޓްކުރުމުގެ ހިދުމަތް ދެމުންނެވެ.
އައިޑީކާޑާއި ޕާސްޕޯޓް ހައްދަން ކޮންމެ ފަހަރަކު މާލެ ނައިސް, އެ ބަޔަކު ދިރިއުޅޭ ރަށަކާ ކައިރިން އެ ހިދުމަތް ލިބޭނެ އިންތިޒާމު ހަމަޖެއްސުމަކީ ރައީސް ޑރ. މުހައްމަދު މުއިއްޒުގެ މުހިންމު ވައުދުފުޅެކެވެ.
ރައީސްގެ އެ ވައުދުފުޅާ އެއްގޮަތަށް, މިދިޔަ އަހަރުން ފެށިގެން އަންނަނީ ރަށްރަށުން އައިޑީކާޑާއި ޕާސްޕޯޓް ނެގޭނެ އިންތިޒާމު ހަމަޖައްސަމުންނެވެ. މި އަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައި ވެސް އައިޑީކާޑު ޕްރިންޓު ކުރެވޭނެ އިންތިޒާމު ހަމަޖެއްސުމަކީ ސަރުކާރުން ކަނޑައަޅާފައިވާ ވަރަށް ބޮޑު އަމާޒެކެވެ.
ހޯމް މިނިސްޓްރީން ބުނީ ރަށްރަށުގެ އާންމުކޮށް ދިވެހިން ގޮސް އުޅޭ ބައެއް ގައުމުތަކުގައި ވެސް މި ހިދުމަތް ފެށުމަށް ޑީއެންއާރުން ތައްޔާރުވަމުން އަންނަ ކަމަށެވެ. އޭގެ ތެރޭގައި މެލޭޝިއާ އާއި ސްރީލަންކާ އާއި އިންޑިއާ އަދި އިނގިރޭސިވިލާތުގައި މި ހިދުމަތް ފެށުމަށް އަންނަނީ ތައްޔާރުވަމުންނެވެ.
