ރޯދަމަހުގެ ފަހު ދިހައެއްގެ ބަންދު ދުވަސްތަކުގެ ތެރެއިން ހަތަރު ދުވަހެއްގައި އައިޑީކާޑު ދޫކުރުމުގެ ހިދުމަތް ދިނުމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން (ޑީއެންއާރު) އިން ނިންމައިފިއެވެ.

ޑީއެންއާރުން ކުރި އިޢުލާނެއްގައި ބުނެފައިވަނީ، ސަރުކާރު ބަންދު މި ދުވަސްވަރު ރައްޔިތުންނަށް ލުއިފަސޭހަކޮށްދިނުމުގެ ގޮތުން ކަނޑައެޅިފައިވާ ޚާއްޞަ ތާރީޚުތަކެއްގައި ކާޑު ދޫކުރުމުގެ މަސައްކަތް ކުރިއަށްދާނެ ކަމަށެވެ. އެގޮތުން މި މަހުގެ 11، 15، 17 އަދި 19 ވަނަ ދުވަހު ހެނދުނު 9:00 އިން މެންދުރުފަހު 1:00 އަށް މި ޚިދުމަތް ލިބޭނެއެވެ.

މާލެ ސަރަހައްދުގައި މި ޚިދުމަތް ފޯރުކޮށްދޭނެ މަރުކަޒުތަކަކީ:

1. ވެލާނާގޭގައި ހުންނަ ޑީއެންއާރުގެ މައި އޮފީސް
2. ހުޅުމާލެ ފޭސް 1 ގައި ހުންނަ އުމަރު ޒާހިރު ބިލްޑިން
3. ހުޅުމާލެ ފޭސް 2 ގައި ހުންނަ ވިނަރެސް ޓަވަރު 2
4. ވިލިމާލޭގައި ހުންނަ ޑީއެންއާރުގެ ސެކްޝަން

ރޯދަމަހުގެ ފަހު ދިހައާއި ފިޠުރުޢީދު ބަންދާ ގުޅިގެން، މި މަހުގެ 21 ވަނަ ދުވަހުގެ ނިޔަލަށް ސަރުކާރު ބަންދުވާއިރު، ރަސްމީކޮށް އޮފީސްތައް ހުޅުވޭނީ މި މަހުގެ 22 ވާ ހޯމަ ދުވަހުއެވެ.