އައިޑީ ކާޑު ޕްރިންޓުކޮށް ދޫކުރުމުގެ ހިދުމަތް ރާއްޖެއިން ބޭރުގައި ފުޅާކުރުމުގެ ގޮތުން، ސްރީލަންކާގައި އެ ހިދުމަތް ދޭން ފަށައިފި އެވެ.
މިކަމާ ގުޅިގެން ޑިޕާޓްމެންޓް އޮފް ނެޝަނަލް ރަޖިސްޓްރޭޝަން (ޑީއެންއާރު) އިން އެކްސްގައި ހިއްސާކުރި ޕޯސްޓެއްގައި ބުނީ، ސްރީލަންކާގައި ހުންނަ ދިވެހިރާއްޖޭގެ ހައިކޮމިޝަނުން އައިޑީ ކާޑު ޕްރިންޓް ކުރުމުގެ ހިދުމަތް މިހާރު ލިބޭނެ ކަމަށާއި މިކަމުގެ ސަބަބުން އެ ގައުމުގައި ދިރިއުޅޭ ދިވެހިންނަށް، ދިވެހި ރައްޔިތެއްކަން އަންގައިދޭ ކާޑު ލިބުން އަވަސްވެގެންދާނެ ކަމަށެވެ.
ސްރީލަންކާގައި އައިޑީ ކާޑުގެ ޕްރިންޓްކޮށް ދޫކުރަން ފެށުމުން މިއީ މި ހިދުމަތް ރާއްޖެއިން ބޭރުން ލިބޭނެ ދެވަނަ ގައުމަށް ވެގެންދާނެ އެވެ. މި ހިދުމަތް އެންމެ ފުރުތަމަ ދޭން ފެށި ގައުމަކީ މެލޭޝިއާ އެވެ. ސަރުކާރުން މިހާރު އަންނަނީ އިތުރު ދިވެހިން ދިރިއުޅޭ އެހެނިހެން ގައުމުތަކުގައިވެސް މި ހިދުމަތް ފުޅާކުރުމަށް މަސައްކަތް ކުރަމުންނެވެ.
ސަރުކާރުން އައިޑީ ކާޑު ޕްރިންޓުކޮށް ދޫކުރުމުގެ މަސައްކަތް ފަށާފައިވަނީ މިދިޔަ އަހަރުގެ ނޮވެމްބަރު މަހުގެ ތެރޭގަ އެވެ.
ހިދުމަތްތައް ހޯދުމަށް މާލެއަށް ބަރޯސާވުމުގެ ބަދަލުގައި ރަށްރަށުގައި ތިބެގެން މިފަދަ އަސާސީ ހިދުމަތްތައް ރައްޔިތުންނަށް ލިބޭނެ އިންތިޒާމު ހަމަޖައްސަވައި ދެއްވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ.
