ހުޅުމާލެ ސެންޓްރަލް ޕާކާއި ބީޗު ފަދަ ތަންތަނުގައި ގޮނޑި، މޭޒާއި، ބެކްޑްރޮޕްއާ ނުލައި ޕިކްނިކް ހަދާނަމަ، ހުއްދަ ހޯދަން ނުޖެހޭނެ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.

އެޗްޑީސީން މިފަދައިން ބުނެފައި މިވަނީ ސެންޓްރަލް ޕާކާއި ބީޗު ފަދަ ތަންތަނުގައި ޕިކްނިކް ހެދުމަށް ހުއްދަ ހޯދަން ޖެހޭނެ ކަމަށް އެ ކޯޕަރޭޝަނުގެ ސްޓާފުންތަކެއް ބުނިކަމަށް ބުނާ މައްސަލައެއް ފެންމަތިވެފައި ވަނިކޮށެވެ.

ސޯޝަލް މީޑިއާގައި އެ ވާހަކަތައް ދައުރުވުމާ ގުޅިގެން އެޗްޑީސީގެ މާކެޓިންގ އެންޑް ޕީއާރު ޑިޕާޓްމަންޓްގެ ހެޑް ހަސަން ޝަހީދު މީޑިއާތަކަށް ފޮނުވި މެސެޖެއްގައި ބުނީ އެހެން ނިންމީ ތަނުގެ ސާފުތާހިރުކަން ބެލެހެއްޓުމަށް ކަމަށެވެ.

ޝަހީދު ވިދާޅުވީ އެތަންތަނުގައި ގޮނޑިއާއި މޭޒާއި ބެކްޑްރޮޕް ފަދަ ތަކެތި ނުބަހައްޓާނަމަ ކޮންމެ ބަޔަކަށްވެސް ޕިކްނިކް ހެދުމަށާއި، ޢާއިލާއާއި ރައްޓެހިންގެ އެއްވުންތައް ހުއްދަ ހޯދުމަކާ ނުލައި ބޭއްވޭނެ ކަމަށެވެ.

އެޗްޑީސީގެ މުވައްޒަފުން މަސައްކަތް ކުރަމުން ދަނީ ހުޅުމާލެ ސާފުތާހިރުކޮށް ރަނގަޅަށް ބެލެހެއްޓުމަށް ކަމަށާއި، ޕާކުތަކާއި ބީޗުތައް ހަޑިވާނެ ގޮތަށް ޢަމަލުކުރާނަމަ މުވައްޒަފުން އަންގަން ޖެހޭ ކަންކަން އަންގާނެ ކަމަށް ޝަހީދު ވިދާޅުވިއެވެ.

އެގޮތުން ކުނި އަޅައި، ތަން ހަޑިކުރާނަމަ އެކަން އެގޮތަށް ނުކުރުމަށް އެޗްޑީސީގެ މުވައްޒަފުން އިރުޝާދު ދޭނެ ކަމަށާއި އެއީ ތަނުގެ ސާފުތާހިރުކަމާއި ރައްކާތެރިކަން ކަށަވަރު ކުރުމަށް ކުރާ ކަމެއް ކަމަށް ޝަހީދު ވިދާޅުވިއެވެ.

ހުޅުމާލޭގެ އެކި ސަރަޙައްދުތަކުގައި ޕިކްނިކް ހެދުމަކީ މިހާރު ވަރަށް އާންމު ކަމެކެވެ. ޚާއްސަކޮށް ނިމިދިޔަ ރޯދަ މަހު، ރޯދަ ވިއްލުމަށްޓަކައި އެފަދަ ޕިކްނިކްތައް އާންމުން ވަނީ ވަރަށް ގިނައިން ބާއްވާފައެވެ. ނަމަވެސް ބައެއް ފަރާތްތަކުން ކުނި އަޅައި ސާފުތާހިރު ނުކުރާކަމީ ސޯޝަލް މީޑިއާގައިވެސް ގިނަ ފަރާތްތަކުން ކަންބޮޑުވުން ފާޅުކުރަމުން އަންނަ ކަމެކެވެ.