ޗައިނާގެ އެންމެ މަޝްހޫރު އޮންލައިން ޕްލެޓްފޯމްކަމުގައިވާ "ޓީމޫ" އިން އެ ކުންފުނީގެ ވިޔަފާރި ދިވެހިރާއްޖެއަށް ފުޅާކޮށްފިއެވެ. މިއީ އެމެރިކާއާއި ޔޫރަޕްގެ ޤައުމުތަކުގައި ނަން މަޝްހޫރު ޓީމޫ މާކެޓްޕްލޭސް މި ސަރަޙައްދުގެ ޤައުމުތަކަށް ފުޅާކުރުމުގެ މަޝްރޫޢުގެ ތެރެއިން އެޅުނު މުހިންމު ފިޔަވަޅެކެވެ.

ޓީމޫގެ ޕްލެޓްފޯމުން ދިވެހި ކަސްޓަމަރުންނަށް ރަނގަޅު ކޮލިޓީގެ ގިނަ އުފެއްދުންތަކެއް ހެޔޮ އަގުތަކެއްގައި ލިބެން ހުންނާނެއެވެ. މީގެ ތެރޭގައި އިލެކްޓްރޯނިކްސް، ފެޝަން، ޒީނަތްތެރިވުމަށް ބޭނުންކުރާ ތަފާތު އުފެއްދުންތަކާއެކު އިތުރު ގިނަ ބާވަތްތަކުގެ މުދާ ހިމެނެއެވެ.

ޓީމޫގެ ޔޫސަރފްރެންޑްލީ އެޕް މެދުވެރިކޮށް ފަސޭހައިން ތަކެތި އޯޑަރުކޮށް ވަގުތުން ފައިސާ ދެއްކޭނެއެވެ. އަދި އޯޑަރުކުރާ ތަކެތި ކުޑަ ދުވަސްކޮޅެއްގެ ތެރޭގައި ސީދާ ކަސްޓަމަރުންނާ ހަމައަށް އިތުބާރާއި ޔަޤީންކަމާއެކު ފޯރުކޮށްދިނުމަކީ، މި އޮންލައިން ޕްލެޓްފޯމްގެ އެންމެ ޚާއްޞަ އެއް ސިފައެވެ.

ޓީމޫއިން އޯޑަރުކުރާ ތަކެއްޗަށް ފްރީ-ޝިޕިންގ ލިބޭ ގޮތަށް ހަމަޖެހިފައިވާއިރު، ޝިޕިންގ ޚަރަދު ކުޑަކުރުމުގެ ގޮތުން އެއް އޯޑަރަކަށް ބައިވަރު ތަކެތި ގަންނާކަށް ނުޖެހޭނެއެވެ. މިކަމުން ކަސްޓަމަރުންނަށް ބޭނުން އިރަކު ފަސޭހަކަމާއެކު ވިޔަފާރިކުރުމުގެ ފުރުޞަތު ލިބިގެންދާނެއެވެ.

ޓީމޫގެ ޚިދުމަތްތައް ރާއްޖޭގެ ކަންކޮޅުތަކަށް ހަލުވިކަމާއެކު ފޯރުކޮށްދިނުމަށްޓަކައި، އެ ކުންފުނިން ވަނީ މޯލްޑިވްސް ޕޯސްޓު ލިމިޓެޑާ ގުޅިގެން، ޕޯސްޓުގެ ނޭޝަންވައިޑް ޑެލިވަރީ ނެޓްވޯކްގެ ޚިދުމަތް ބޭނުންކުރަން ފަށާފައެވެ. މި އިސްތިރާޖީ ގުޅުމުގެ ދަށުން، ރާއްޖޭގެ އެކި ކަންކޮޅުތަކުގައި ތިބި ޓީމޫގެ ކަސްޓަމަރުންނަށް އެފަރާތްތަކުގެ އޯޑަރުތައް ޕިކްޕޯސްޓާއި، ހޯމްޑެލިވަރީ އަދި ކައުންޓަރ ޑެލިވަރީ މެދުވެރިކޮށް އަވަހަށް ލިބޭނެ ގޮތް ފަހިކޮށްދިނުމުގެ އިންތިޒާމްތައް މިހާރު ވަނީ ހަމަޖެހިފައެވެ.

މޯލްޑިވްސް ޕޯސްޓުން ބުނީ ދިވެހިރާއްޖޭގައި އީ-ކޮމާސްގެ ދާއިރާ އިތުރަށް ފުޅާކުރުމަށް އެ ކުންފުނިން ދަނީ ގިނަ މަސައްކަތްތަކެއް ކުރަމުންދާކަމަށެވެ. އެގޮތުން ޗައިނާއާއި ތައިލެންޑް އަދި އިންޑިއާ ފަދަ ޤައުމުތަކުގެ އޮންލައިން ޕްލެޓްފޯމްތަކާ ގުޅިގެން މިހާރުވެސް ގިނަ މަސައްކަތްތަކެއް ކުރަމުންދާ ކަމަށް މޯލްޑިވްސް ޕޯސްޓުން ބުންޏެވެ.