އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ތަރައްޤީކޮށް ބޭނުންކުރުމުގައި، އެ ޓެކްނޮލޮޖީ އަބަދުވެސް އޮންނަންވާނީ އިންސާނުންގެ ފުރިހަމަ ކޮންޓްރޯލްގެ ދަށުގައިކަން ޗައިނާ އަދި އެމެރިކާއިން ކަށަވަރުކުރަންޖެހޭ ކަމަށް ޗައިނާގެ ރައީސް ޝީ ޖިންޕިންގ ވިދާޅުވެއްޖެއެވެ.

އެމެރިކާގެ އިސްވެރިންނާއެކު ބޭއްވުނު މަތީ ފަންތީގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ޝީ ވިދާޅުވީ، ޗައިނާއާއި އެމެރިކާގެ ގުޅުމަކީ ސްޓްރެޓީޖިކް ގޮތުން ހަމަޖެހުން ޤާއިމުވެފައިވާ ގުޅުމެއް ކަމަށާއި، މިއަދު ދުނިޔޭގެ ކުރިމަތީގައި ދެ ޤައުމުން ވެސް އުފުލަންޖެހޭ ތާރީޚީ ބޮޑު ޒިންމާއެއް އެބައޮތް ކަމަށެވެ. އެގޮތުން، މި ޒިންމާގެ މުހިންމު އެއް ބަޔަކީ އޭއައި ރައްކާތެރިކަމާއެކު ކުރިއެރުވުން ކަމުގައި އެމަނިކުފާނު ފާހަގަކުރެއްވިއެވެ.

"ޗައިނާ އަދި އެމެރިކާއަކީ އާޓިފިޝަލް އިންޓެލިޖެންސްގެ ދާއިރާގައި އެންމެ ކުރީގައި އުޅޭ ދެ ޤައުމު،" ރައީސް ޝީ ވިދާޅުވިއެވެ. "އިންސާނިއްޔަތަށް ފައިދާހުރި ގޮތުގައި އޭއައި ތަރައްޤީކޮށް ބެލެހެއްޓުމުގެ ޤާބިލުކަމާއި ޒިންމާ މި ދެ ޤައުމަށް އެބައޮތް. އަދި އޭއައިގެ ތަރައްޤީ އަބަދުވެސް އިންސާނުންގެ ކޮންޓްރޯލްގެ ދަށުގައި ބޭއްވުމާއި، މީސްތަކުންގެ ލާބައާއި މަންފާއަށް ޚިދުމަތްކުރާ އެއްޗަކަށް ހެދުން ކަށަވަރުކުރަންޖެހޭ."

ޓެކްނޮލޮޖީ ދާއިރާގެ އިސް ތަޖުރިބާކާރުންނާއި ލީޑަރުން އޭއައިގެ ނުރައްކާތަކާ މެދު ކަންބޮޑުވުން ފާޅުކޮށް، އިންޒާރުތައް އިތުރުކުރަމުންދިޔަ ނަމަވެސް، މި ބައްދަލުވުމުގެ ކުރިން ދެ ޤައުމުން ވެސް ވަނީ އޭއައި ރެގިއުލޭޓް ކުރުމުގައި މިހާރު އޮތް އުސޫލުތައް ދެމެހެއްޓުމަށް ބޭނުންވާކަމުގެ އިޝާރާތެއް ދީފައެވެ.

މި ބައްދަލުވުމުގައި ވިޔަފާރިއާއި، ސަރަޙައްދީ ހަމަޖެހުމުގެ އިތުރުން ކުރިއަރަމުން އަންނަ އައު ޓެކްނޮލޮޖީތައް ބޭނުންކުރުމުގައި ދުނިޔޭގެ ސަލާމަތާއި ރައްކާތެރިކަން ދެމެހެއްޓުމާ ގުޅޭގޮތުން ދެ ޤައުމުގެ ދެމެދުގައި ފުޅާ ދާއިރާއެއްގައި މަޝްވަރާކުރެވުނެވެ.