މާލެ-ވިލިމާލެ ގުޅުވާލާ ތިލަމާލެ ބްރިޖުގައި ދުނިޔޭގެ އެންމެ އުސް ޕްރީކާސްޓް ސެގްމަންޓް މިއަދު ބަހައްޓައިފިއެވެ.
އިންޑިއާގެ ހައިކޮމިޝަނުން މިއަދު އެކްސްގައި ކުރި ޕޯސްޓެެއްގައި ވަނީ މިއީ ދުނިޔޭގެ އެންމެ އުސް ޕްރީކާސްޓްކަން ފާހަގަކޮށް، މިއީ އިންޖިނިއަރިންގެ ދާއިރާއިން ހޯދުނު ބޮޑު ކާމިޔާބެއް ކަމަށް ބުނެފައެވެ.
މި ޕްރީކާސްޓްގެ އުސްމިނުގައި 8.2 މީޓަރު ހުންނަ އިރު، ފުޅާމިނުގައި ހުންނަނީ 25.3 މީޓަރެވެ. މިއީ 216.04 މެޓްރިކް ޓަނުގެ ބަރުދަން ހުރި ޕްރީކާސްޓެކެވެ.
އިންޑިއާއިން އެކްސްގައި ކުރި ޕޯސްޓާ ގުޅިގެން ކޮންސްޓްރަކްޝަން މިނިސްޓަރު ޑރ. އަބްދުالله މުއްޠަލިބް ވިދާޅުވީ މި ބޮޑު ކާމިޔާބާއެކު ބްރިޖްގެ މަސައްކަތް ތާވަލަށް ބަރާބަރަށް ނިންމާލެވުމަކީ ވަރަށް ބޮޑު އުންމީދެއް ކަމަށެވެ.
އަދި އިންޑިއާ ސަފީރާއި ކަމާބެހޭ ފަރާތްތަކުން ބްރިޖުގެ މަސައްކަތް ހަލުވި ކުރެއްވުމަށް ދެއްވާ އިސްކަން މިނިސްޓަރު ފާހަގަކުރެއްވި އެވެ.
7 ބިލިއަން ރުފިޔާގެ މި މަޝްރޫޢު ކުރިއަށްގެންދަނީ އިންޑިއާގެ އެފްކޮންސް އިންފްރާސްޓްރަކްޗަރާއި ހަވާލުކޮށްގެންނެވެ.
މި މަޝްރޫޢުގެ ދަށުން 6.7 ކިލޯމީޓަރުގެ ދިގު ބްރިޖަކާއި ކޯސްވޭ ލިންކެއް އަޅާނެއެވެ. އަދި ދެރަށް ދޭތެރޭ ކަނޑުގައި އަޅާ މައި ބްރިޖުތަކުގައި 140 މީޓަރު ހުންނާނެ ކަމަށް އެފްކޮންސް އިން ބުނެއެވެ.
މިއީ ކުރީ ސަރުކާރުން ފެށި މަޝްރޫޢެއް ނަމަވެސް ކުރީން ކަނޑައެޅި އެއްވެސް ތާރީޚަކަށް ނިންމާލެވޭ ގޮތެއް ނުވިއެވެ.
މި ސަރުކާރުން ވެރިކަމާ ހަވާލުވުމަށްފަހު މަޝްރޫޢުތައް ހަލުވިކަމާއެކު ކުރިއަށްގެންގޮސް ނިންމުމަށް ޚާއްސަ އިސްކަމެއް ދީގެން އަންނަނީ މަސައްކަތް ކުރަމުންނެވެ.
