ސްރީލަންކާގެ ލަންކާ ހޮސްޕިޓަލްސްއިން އާސަންދައިގެ ޚިދުމަތް މެދުކެނޑިފައިވާ މައްސަލައަށް ހައްލު ހޯދުމަށް ސަރުކާރުން މަސައްކަތް ކުރަމުންދާ ކަމަށް އާސަންދައިން ބުނެފިއެވެ.
އާސަންދައިން މައުލޫމާތި ދިން ގޮތުގައި، ކޮލޮމްބޯގައި ހުންނަ ލަންކާ ހޮސްޕިޓަލްސްއިން ފަރުވާ ހޯދާ ފަރާތްތަކަށް އާސަންދައިގެ ޚިދުމަތް މިވަގުތު މެދުކެނޑިފައިވަނީ އެ ހޮސްޕިޓަލުން ކްރެޑިޓް އުޞޫލުން ޚިދުމަތްދިނުން ހުއްޓާލުމާ ގުޅިގެންނެވެ.
އާސަންދައިގެ މެނޭޖިންގ ޑިރެކްޓަރ އާމިނަތު ޒީނިއާ ވިދާޅުވީ، މި މައްސަލައަށް ހައްލެއް ހޯދުމަށް މިހާރުވެސް މާލީ ވުޒާރާއާއެކު މަސައްކަތް ކުރަމުން ގެންދާ ކަމަށެވެ. ނަމަވެސް މި މައްސަލަ ހައްލުކުރުމަށް ނަގާނެ ސީދާ މުއްދަތެއް އެނގިވަޑައިނުގަންނަވާ ކަމަށް ޒީނިއާ ވިދާޅުވިއެވެ.
އާސަންދައިން ބޭސް ހޯދުމުގައި ރައްޔިތުންނަށް ދަތިކަމެއް ނުވަތަ މާލީ ތަކުލީފެއް ކުރިމަތިނުވާނެކަން ކަށަވަރުކުރުމަށާއި، އާސަންދައިން ބޭހަށް ކުރާ ޚަރަދު ކުޑަކުރުމަށް ނިޒާމަށް ގެންނަންޖެހޭ ބަދަލުތައް މިހާރު ވަނީ ކަނޑައަޅާފައެވެ.
