ހުޅުމާލެ މަސްޖިދު އަޒީޒާ މޫސާގައި މިއަދު ޢީދު ނަމާދުކުރުމަށް ހަމަޖެހިފައިވާ އިމާމު އަދި ބަދަލު އިމާމު ހާޒިރުނުވުމާއި ގުޅިގެން އިސްލާމީ ކަންތައްތަކާބެހޭ ވުޒާރާއިން އެ ދެ ފަރާތަށް ވަގުތުން ފިޔަވަޅު އަޅައިފި ކަމަށް އިސްލާމީ ކަންތައްތަކާބެހޭ ވުޒާރާއިން މަޢުލޫމާތު ދެއްވައިފިއެވެ.

ވުޒާރާއިން މަޢުލޫމާތު ދެއްވި ގޮތުގައި، އުޞޫލުގެ ތެރެއިން މައްސަލަ ބެލުމަށްފަހު، ޢީދު ނަމާދަށް ހާޒިރުނުވި އިމާމަށް 5 އަހަރު ދުވަހުގެ މުއްދަތަށް ރާއްޖޭގެ ހުރިހާ ރަށެއްގައި އިމާމުވެ ނަމާދުކުރުމާއި ޚުޠުބާ ކިޔުމުގެ ފުރުޞަތު ނުދިނުމަށް ވަނީ ނިންމާފައެވެ.

މީގެއިތުރުން، އެ މިސްކިތުގެ އަސްލު އިމާމުވެސް މިނިސްޓްރީއަށް ނާންގައި ޖަމާޢަތަށް ހާޒިރުނުވާތީ، އެ މައްސަލަ ވަކިން ބަލައި އުޞޫލުގެ ތެރެއިން އިމާމުކަމުގެ ވަޒީފާއިން ސަސްޕެންޑްކުރުމަށް ކަމާބެހޭ ޔުނިޓަށް އަންގާފައިވާ ކަމަށް ވުޒާރާއިން ބުންޏެވެ.

ރާއްޖޭގެ އެހެން ރަށްތަކުގައި ޢީދު ނަމާދު ފެށި ގަޑި ކަމުގައިވާ ހެނދުނު 7:00 އަށް އަޒީޒާ މިސްކިތުގެ އިމާމުންގެ ތެރެއިން އެއްވެސް ފަރާތެއް ހާޒިރުނުވުމާއި ގުޅިގެން، އެ މިސްކިތުގައި ޢީދު ނަމާދު ފެށުނީ 7:15 ހާއިރުގައެވެ. ނަމާދު ކުރިއަށް ގެންދިޔައީ މިސްކިތުގައި އިން ރާއްޖެއިން ބޭރުގެ ރައްޔިތެއް ކަމަށް މަޢުލޫމާތު ލިބިފައިވެއެވެ.

މި ހާދިސާއާއި ގުޅިގެން އިސްލާމީ ކަންތައްތަކާބެހޭ ވުޒާރާއިން ވަނީ އިމާމުންގެ ޒިންމާދާރުކަން އިތުރުކުރުމަށް އަޅަންޖެހޭ ފިޔަވަޅުތައް އަޅަމުންދާ ކަމަށް ބަޔާންކޮށްފައެވެ. އަދި މުސްތަޤުބަލުގައި މިފަދަ ހާދިސާތައް ތަކުރާރުވިޔަ ނުދިނުމަށް އިތުރު ފިޔަވަޅުތަކެއް އަޅާނެ ކަމަށްވެސް އެ ވުޒާރާއިން ވަނީ ހާމަކޮށްފައެވެ.