ފިތުރު އީދު ފާހަގަކުރުމަށް ހުޅުމާލޭގައި ޚާއްޞަ ހަރަކާތްތަކެއް ކުރިއަށްދާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ހާމަކޮށްފިއެވެ.

އެޗްޑީސީގެ އެސިސްޓެންޓް މެނޭޖަރ، ޕަބްލިކް ރިލޭޝަންސް މުޙައްމަދު ސިރާޖު ވިދާޅުވި ގޮތުގައި މިއަދު ހަވީރު 4:00 އިން 5:45 އަށް ހުޅުމާލެ ސެންޓްރަލް ޕާކުގައި އީދު ފެސްޓިވަލެއް ބޭއްވުމަށް ވަނީ ހަމަޖެހިފައެވެ. މި ފެސްޓިވަލަކީ އެޗްޑީސީ އާއި މަންފާ ޖަމްޢިއްޔާ ގުޅިގެން ކުރިއަށްގެންދާ ހަރަކާތެކެވެ.

މީގެ އިތުރުން، މިރޭ 8:30 ގައި ހުޅުމާލެ ސެންޓްރަލް ޕާކުގައި ޑްރޯން ޝޯއެއް ބޭއްވުމަށްފަހު، 9:00 ގައި ހަވާއެރުވުމުގެ ހަރަކާތެއް ކުރިއަށްދާނެ ކަމަށް ވެސް ސިރާޖު ހާމަކުރެއްވިއެވެ.

އީދާއި ގުޅިގެން ހުޅުމާލޭގެ އެކި ސަރަހައްދުތައް ދިއްލުމަށް އީދު ލައިޓްތައް ހަރުކޮށް، ރޭ ބޭއްވުނު ޚާއްޞަ ރަސްމިއްޔާތަކާއެކު ލައިޓްތައް ވަނީ ދިއްލާލާފައެވެ. މީގެ އިތުރުން، މިއަދު ހެނދުނު ހުޅުމާލޭގެ ދެ ސަރަހައްދެއްގައި ބޮޑު ޖަމާޢަތުގައި އީދު ނަމާދު ކުރެވުނެވެ.

އެޗްޑީސީން ވަނީ އީދުގެ ތެރޭގައި ބައިބަލާ މުބާރާތެއް ބޭއްވުމަށްވެސް ރާވާފައެވެ. އަދި ސަލާމަތީ ބާރުތަކާއި ސަރުކާރު ހިއްސާވާ ކުންފުނިތައް ގުޅިގެން ބާއްވާ "އީދު ހަވީރު 1446" ގައިވެސް އެޗްޑީސީން ބައިވެރިވާނެއެވެ.

އެޗްޑީސީން ބުނީ އެޗްޑީސީގެ ސްޓޯލުގައި ބައުންސީ ކާސްލްއަކާއި ކުދިންގެ ހުނަރު ދައްކާލެވޭނެ ގޮތަށް އީދު ކާޑު ތައްޔާރުކުރުން ފަދަ ގިނަ ހަރަކާތްތަކެއް ކުރިއަށްދާނެ ކަމަށް ސިރާޖު ވިދާޅުވިއެވެ. މީގެ އިތުރުން، ޓްރެފިކް ގަވާއިދުތަކަށް ކުޑަކުދިން އަހުލުވެރިކުރުމަށް މަޢުލޫމާތު ހިއްސާކުރެވޭނެއެވެ.

އެޗްޑީސީން މި ހުރިހާ ހަރަކާތްތަކެއް ރާވާފައިވަނީ މުޖުތަމަޢުގެ އެއްބައިވަންތަކަން ދައްކުވައިދޭ ގޮތަށް، ވީހާވެސް ގިނަ އާއިލާތަކަށް ބައިވެރިވެވޭނެ ގޮތަށެވެ. މި ހަރަކާތްތަކުގައި ބައިވެރިވުމަށް އެޗްޑީސީން ވަނީ އާންމުންނަށް ދަޢުވަތު ދީފައެވެ.