ޔުކްރެއިންގައި ހިނގަމުންދާ ހަނގުރާމަ ހުއްޓާލުމަށް ހުށަހެޅިފައިވާ ހުށަހެޅުންތަކަށް އިންކާރުކޮށް، ރަޝިއާއިން ދެމުންދާ ހަމަލާތައް ވަރުގަދަ ކޮށްފި ކަމަށް ހަބަރުތައް ބުނެފިއެވެ.

އިއްޔެ ވެސް ރަޝިޔާގެ ބާރުތަކުން ވަނީ ޔުކްރެއިންގެ ވެރިރަށް ކީވްއަށް ޑްރޯން ހަމަލާތަކެއް ދީފައެވެ. މި ހަމަލާތަކުގައި މަދުވެގެން 7 މީހުން މަރުވެފައިވާ ކަމަށް ރިޕޯޓުތަކުން ދައްކައެވެ. މީގެ ތެރޭގައި 5 އަހަރުގެ ކުޑަ އަންހެން ކުއްޖަކާއި އެ ކުއްޖާގެ ބައްޕަ ހިމެނެއެވެ.

މި ހަނގުރަމަ ހުއްޓުވުމަށް މި ދަނޑިވަޅުގައި ސަޢޫދީ ޢަރަބިއްޔާގައި ޑިޕްލޮމެޓިކް މަސައްކަތްތަކެއް ދަނީ ކުރިޔަށެވެ. މި ގޮތުން އެމެރިކާ އާއި ޔުކްރެއިންގެ ވަފުދުތަކާއި ރަޝިޔާގެ ބައެއް މަންދޫބުންނާ ދެމެދު ނުސީދާ މަޝްވަރާތަކެއް ކުރިޔްށް އެބަ ދެއެވެ. ނަމަވެސް، މި މަޝްވަރާތަކުގެ ތެރެއިންވެސް ޕޫޓިން ވަނީ ޔުކްރޭނުގެ ސަރުކާރުން ބޭނުންވާ ގޮތަށް އެތަނުގައި ހުޅަނގުގެ މަސްލަހަތު ހިމޢޔަތް ކޮށް ރަޝިއާއިން ގެއްލުންވާ ހުރިހާ ހުށަހެޅުންތަކަށް އިންކާރު ކުރައްވާފައެވެ.

ބްރިޓިޝް ބޮޑުވަޒީރު ކީރ ސްޓާމަރ ހުށަހަޅުއްވާފައި ވަނީ ޔުކްރެއިންއަށް ސުލްޙައިގެ ސިފައިން ފޮނުވުމަށެވެ. މިއީ ސީދާ ރަޝިއާއަށް ޖެއްސުން ކުރުމުގެ ގޮތުން ކުރަން އުޅޭ ކަމެއް ކަމަށް ޕޫޓިން ޤަބޫލުކުރެއެވެ.

ޔޫރަޕްގެ ގިނަ ޤައުމުތަކުން، ޚާއްޞަކޮށް ފުރާންސުން ވެސް ބޭނުންވަނީ ޔުކްރޭނަށް ލަޝްކަރެއް ފޮނުވާށެވެ. ނަމަވެސް އެމެރިކާގެ މަންދޫބު މިކަމާއި އެއްބަހެއް ނުވެއެވެ.

އިއްޔެ ރަޝިއާއިން ހަމަލާތައް ވަރުގަދަކޮށްލާފައިވާއިރު، ޔުކްރެއިންގައި ހިނގަމުންދާ ހަނގުރާމައިގައި މިހާތަނަށް މަރުވެފައިވާ މީހުންގެ އަދަދު 280,000 އާއި 300,000 އާ ދެމެދުގައި ހުރެދާނެ ކަމަށް އެކި ފަރާތްތަކުން އަންދާޒާކުރާ ކަމަށް ރިޕޯޓުތަކުން ދައްކައެވެ. މި އަދަދުގެ ތެރޭގައި އާންމު ރައްޔިތުންނާއި ސިފައިން ހިމެނެއެވެ.

އދ. ގެ އިންސާނީ ޙައްޤުތަކާބެހޭ އޮފީހުން ބުނާ ގޮތުގައި 2025 ވަނަ އަހަރުގެ ޖެނުއަރީ 31 ގެ ނިޔަލަށް 12,605 އާންމު ރައްޔިތުން މަރުވެފައިވެއެވެ. އެހެންނަމަވެސް، ޔުކްރެއިނުން ބުނާ ގޮތުގައި 2023 ވަނަ އަހަރުގެ ޖެނުއަރީ މަހުގެ ނިޔަލަށް 16,500 އާންމު ރައްޔިތުން މަރުވެފައިވެއެވެ.

އެމެރިކާގެ އޮފިޝަލުން ބުނާ ގޮތުގައި 2023 ވަނަ އަހަރުގެ އޯގަސްޓު މަހުގެ ނިޔަލަށް ޔުކްރެއިން އަދި ރަޝިޔާގެ ސިފައިންގެ ތެރެއިން މަރުވެ އަދި ޒަޚަމްވި މީހުންގެ އަދަދު 500,000 އާ ގާތްކުރެއެވެ. އަދި ބްރިޓިޝްގެ ދިފާޢީ މިނިސްޓްރީން ބުނާ ގޮތުގައި ރަޝިޔާގެ ސިފައިންގެ ތެރެއިން މަރުވެ އަދި ޒަޚަމްވި މީހުންގެ އަދަދު 900,000 އާ ގާތްކުރެއެވެ. މީގެ ތެރެއިން 200,000 އާއި 250,000 އާ ދެމެދުގެ އަދަދެއްގެ މީހުން މަރުވެފައިވާ ކަމަށް އެ މިނިސްޓްރީން ލަފާކުރެއެވެ.

ނަމަވެސް މި މަޢުލޫމާތުތަކުގެ ޞައްޚަ ކަމެއް ކަށަވަރު ކުރާކަށް އެއްވެސް ބަޔަކްށް ނޭނގެއެވެ.

ރިޕޯތްތަކުން ބުނާ ގޮތުގައި ހަނގުރާމައިގެ ސަބަބުން ލިބޭ ގެއްލުންތަކުގެ ސީދާ އަދަދު ހޯދުމަކީ ދަތި ކަމެކެވެ.