ސަލާމަތީ ސަބަބުތަކަށްޓަކައި ދޯނީގައި ފަޅުވެރިން ތިބުން ލާޒިމް ކޮށްފި

ފަޅުތެރޭގައި އަދި ކަނޑުގެ އެކި ސަރަހައްދުތަކުގައި ނަގިލި ލުމަށްފަހު އުޅަނދު ބެލެހެއްޓުމަށް އެކަށީގެންވާ އަދަދަށް ފަޅުވެރިން ނެތި އުޅަނދު ދޫކޮށްލާފައި ބޭއްވުމުގެ ސަބަބުން ނުރައްކާތެރި ހާދިސާތައް ދިމާވެ، މީހުންގެ މުދަލަށް ގެއްލުންވަމުންދާ ކަމަށް ފާހަގަކުރެވޭތީވެ، އުޅަނދުތަކުގައި ފަޅުވެރިން ތިބެން ޖެހޭނެ ކަމަށް އަންގައި ޓްރާންސްޕޯޓް މިނިސްޓްރީން އެކަން ޢަންމުކޮށް އިޢުލާން ކޮށްފިއެވެ.

މިނިސްޓްރީގެ އިޢުލާނުގައި، ފަޅުތެރޭގައި ވިޔަސް އަދި ކަނޑުމަތީގައި ވިޔަސް ކަނޑުއުޅަނދެއްގައި މީހަކު ނެތި ބޭއްވުން މަނާކޮށްފައިވެއެވެ. އަދި މިގޮތަށް އަމަލުކުރާ ފަރާތްތަކާއި މެދު "ދިވެހިރާއްޖޭގެ ކަނޑުގެ ސަރަހައްދުގައި ދަތުރުކުރާ އުޅަނދުފަހަރުގެ ސަލާމަތާބެހޭ ގަވާއިދު" ގެ ދަށުން ފިޔަވަޅު އަޅާނެ ކަމަށް މިނިސްޓްރީން ވަނީ އިންޒާރު ވެސް ދީފައެވެ.

މީގެ ކުރިން އޮޑިދޯނިފަހަރު “ބޯސާކޮށްފައި” އޮންނައިރު އޭގައި މީހުން ތިބުމަކީ ލާޒިމު ކަމެއް ނޫނެވެ.