ޤައުމީ އެއަރލައިން، މޯލްޑިވިއަނުން ޢީދު ބަންދާއި ދިމާކޮށް އިތުރު 30 ދަތުރެއް ކުރުމަށް ނިންމައިފިއެވެ.

މި ދަތުރުތައް ކުރުމަށް ހަމަޖެހިފައިވަނީ ރާއްޖޭގެ 11 ރަށަކަށެވެ.

މޯލްޑިވިއަނުން ބުނީ މި އިތުރު ދަތުރުތައް ހަމަޖައްސާފައިވަނީ ޢީދާ ދިމާކޮށް އިތުރުވާ ޑިމާންޑަށް އެކަށީގެންވާ ޚިދުމަތެއް ދިނުމަށް ކަމަށެވެ. އެގޮތުން ފުވައްމުލަކު ސިޓީއަށް އިތުރު 5 ދަތުރެއް ކުރުމަށް ވަނީ ހަމަޖެހިފައެވެ. އަދި އައްޑޫ ސިޓީ ގަމަށްވެސް އާންމު ދަތުރުތަކުގެ އިތުރުން އިތުރު ދަތުރުތަކެއް ކުރުމަށް ވަނީ ނިންމާފައެވެ.

މީގެ އިތުރުން ހއ. ހޯރަފުށި، ހދ. ހަނިމާދޫ، ހދ. ކުޅުދުއްފުށި، ށ. ފުނަދޫ، ލ. ކައްދޫ، ގއ. ކޫއްޑޫ، ގދ. ކާޑެއްދޫ، ގދ. މާވަރުލު އަދި ގދ. ފަރެސްމާތޮޑާއަށްވެސް އިތުރު ދަތުރުތަކެއް ކުރުމަށް ވަނީ ހަމަޖެހިފައެވެ.

މޯލްޑިވިއަނުން އިތުރު ދަތުރުތައް ފަށާނީ މާރިޗު 29 އިން ފެށިގެން އެޕްރީލް 4 އާ ހަމައަށެވެ. އަދި މާރިޗު 31 އިން ފެށިގެން ބ. ފުޅަދޫއަށް ސީޕްލޭން ދަތުރުތަކެއްވެސް ފެށުމަށް ވަނީ ނިންމާފައެވެ.

މޯލްޑިވިއަނުގެ ފްލީޓުގައި މިވަގުތު 25 ބޯޓު ހިމެނެއެވެ. އޭގެ ތެރޭގައި އޭޓީއާރު، ޑޭޝް8، އޭ320 ނެރޯބޮޑީ އަދި ސީޕްލޭން ބޯޓުތައް ހިމެނެއެވެ. މި ބޯޓުތައް ބޭނުންކުރަނީ ރާއްޖޭގެ އެތެރޭގެ އުދުހުންތަކަށެވެ.

މޯލްޑިވިއަނުން ބުނީ މި އިތުރު ދަތުރުތަކާއެކު ޢީދާ ދިމާކޮށް އިތުރުވާ ދަތުރުވެރިންގެ ޑިމާންޑަށް ފުރިހަމައަށް ޚިދުމަތް ދެވޭނެ ކަމަށެވެ.