ލިވަޕޫލް ފުޓްބޯޅަ ކްލަބާއި ވިޒިޓް މޯލްޑިވްސް އާ ދެމެދު ސްޓްރެޓެޖިކް ޕާޓްނަރޝިޕެއް ޤާއިމްކޮށްފިއެވެ. މި ޕާޓްނަރޝިޕްގެ ދަށުން ދިވެހިރާއްޖެއަކީ ލިވަޕޫލްގެ ރަސްމީ ފަތުރުވެރިކަމުގެ މަންޒިލުގެ ޕާޓްނަރަށް ވެގެންދާނެއެވެ.

މި ޕާޓްނަރޝިޕް ރަސްމީކޮށް އިފްތިތާޙްކުރާނީ އަންނަ އޭޕްރީލް މަހުގެ 2 ވަނަ ދުވަހު ލިވަޕޫލް އެފްސީ އެވަޓަންއާ ދެކޮޅަށް ކުޅޭ މެޗުގައެވެ. މި މެޗުގައި އެންފީލްޑް ސްޓޭޑިއަމްގެ ލެޑް ބޯޑުތަކުގައި މި ޕާޓްނަރޝިޕާއި ދިވެހިރާއްޖޭގެ މަންޒަރުތައް ދައްކާލުމަށް ވަނީ ހަމަޖެހިފައެވެ.

މި ޕާޓްނަރޝިޕްގެ ދަށުން ލިވަޕޫލްގެ ހޯމް މެޗުތަކުގައި ވިޒިޓް މޯލްޑިވްސްގެ ބްރޭންޑް ވިޒިބިލިޓީ އާއި އެލްއީޑީ ނިޝާން ފެންނަން ހުންނާނެއެވެ. އަދި ސްޓޭޑިއަމްގެ އެކި ސަރަހައްދުތަކުގައި ބްރޭންޑިންގް ޖަހައި، ލިވަޕޫލްގެ ރަސްމީ ޕަބްލިކޭޝަންތަކުގައި ދިވެހިރާއްޖެ ޕްރޮމޯޓްކުރެވޭނެއެވެ.

ވިޒިޓް މޯލްޑިވްސްގެ ސީއީއޯ އިބްރާހިމް ޝިއުރީ ވިދާޅުވީ، މި ޕާޓްނަރޝިޕްގެ އަމާޒަކީ ހުވަފެންތައް ހަޤީޤަތަކަށް ވާ މަންޒިލެއްގެ ގޮތުގައި ރާއްޖެ ތަޖުރިބާ ކުރުމަށް އެތައް މިލިއަން ސަޕޯޓަރުންނަށް ހިތްވަރު ދިނުން ކަމަށެވެ.