ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ސީނިއާ ވައިސް ޕްރެޒިޑެންޓް އަހުމަދު ޝަކީބް (ޑޮކް) އާއި ކުރީގެ ޖެނެރަލް ސެކްރެޓަރީ ހުސައިން ޖަވާޒް، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލްގެ މައްޗަށް އުފުލާފައިވާ ދެ ދައުވާއެއްގެ ދިފާއުގައި ހެކިބަސް ދިނުމަށް ނަން ހުށަހަޅައިފިއެވެ.
ބައްސާމްގެ މައްޗަށް އުފުލާފައިވާ ދެ ދައުވާއެއްގެ އަޑުއެހުމެއް މިއަދު ކްރިމިނަލް ކޯޓުގައި ބާއްވައިފި ވެއެވެ.
އެ ދައުވާއަށް ކުރިން ބައްސާމްގެ ވަކީލު ވަނީ އިންކާރުކޮށްފަ އެވެ. މިއަދުގެ އަޑުއެހުމުގައި ބައްސާމްގެ ވަކީލު ވިދާޅުވީ އެފްއޭއެމްއަށް ލިބުނު އެއްވެސް ފައިސާއަކަށް ޚިޔާނާތްތެރިވެވަޑައިނުގަންނަވާ ކަމަށެވެ. ވަކީލު ވިދާޅުވީ ބައްސާމަށް ލިބުނު ފައިސާއަކީ އޭނާގެ މުސާރަ ކަމަށެވެ. ބައްސާމަށް މުސާރައިގެ ގޮތުގައި މަހަކު 3،000 ޑޮލަރު ލިބޭ ކަމަށް ވަކީލު ވިދާޅުވި އެވެ.
Advertisement
މިއަދު ކޯޓުގައި ވަކީލު ވިދާޅުވީ އޭނާއަށް ލިބުނު ފައިސާއަކީ ފީފާއިން އޭނާއަށް ލިބުނު މުސާރަ ކަމަށެވެ. އެހެންކަމުން މައްސަލަ ކުރިއަށް ނުގެންދެވޭނެ ކަމަށް ބުނެ ބައްސާމްގެ ވަކީލު ވަނީ މައްސަލަ ކުރިއަށް ގެންދެވޭނެ ތަނެއް ނެތް ކަމަށް ކަނޑައެޅުމަށް ކޯޓުގައި އެދިވަޑައިގެންފަ އެވެ.
ބައްސާމްގެ މައްޗަށް ފުރަތަމަ ދެ ދައުވާ އުފުލާފައި ވަނީ ފީފާގެ ފައިސާގެ ތެރެއިން 10،000 ޑޮލަރު އޭނާގެ އަމިއްލަ އެކައުންޓަށް ފޮނުވައި އަމިއްލަ ބޭނުންތަކަށް ބޭނުން ކުރުމުންނެވެ.
މިއަދުގެ ޝަރީއަތުގެ އަޑުއެހުމުގައި ބައްސާމްގެ ދިފާއުގައި ފާހަގަކުރި ނުކުތާއަކީ ޝަރީއަތުގެ ކުރިން ހުށަހެޅި މައްސަލައެއްގެ ގޮތުގައި ނިންމަވާ ކްރިމިނަލް ކޯޓުގެ ގާޒީ ވިދާޅުވީ އެ ހުށަހެޅުން ބަލައިނުގަންނާނެ ކަމަށެވެ.
ޕީޖީ އޮފީހުން ކުރިން ބުނެފައި ވަނީ 2018 ވަނަ އަހަރުގެ ޖުލައި މަހާއި އޮގަސްޓް މަހާއި ދެމެދު ފީފާއިން ޖަމާކުރި ފައިސާގެ ތެރެއިން 10،000 ޑޮލަރު ބޭންކަށް ލިޔެކިޔުންތައް ހުށަހަޅައިގެން 2018 ވަނަ އަހަރުގެ އޮގަސްޓް މަހު ބައްސާމްގެ ބީއެމްއެލް އެކައުންޓަށް ޖަމާކޮށްފައިވާ ކަމަށެވެ. އެ ފައިސާ ޖަމާކޮށްފައި ވަނީ ބޭންކް ޗާޖު އުނިކުރުމަށް ފަހު ބައްސާމްގެ އެކައުންޓުގައި 9،999 ޑޮލަރު ބާކީ ވެގެންނެވެ. އެ ފައިސާގެ ތެރެއިން 1،910 ޑޮލަރު އެހެން މީހެއްގެ އެކައުންޓަށް ޖަމާކުރުމަށް ފަހު ބައްސާމް އާއި އޭނާގެ އަންހެނުން އައިމިނަތު މައުރީން އެ ފައިސާ ގްލޭޝިއާ އިންވެސްޓްމަންޓްގެ އެކައުންޓަށް ޖަމާކޮށް ކުންފުނީގެ އެކި ބޭނުންތަކަށް ބޭނުންކުރި ކަމަށް ޕީޖީ އޮފީހުން ބުނެ އެވެ.
މީގެ އިތުރުން އެ ފައިސާއިން އޭނާ ކުއްޔަށް ހިފާފައިވާ ރެހެންދި ފްލެޓުގެ ކުލި ދެއްކުމަށާއި އެފްއޭއެމްއާއި ގުޅުން ނެތް ކަންކަމަށް ވެސް ވަނީ ބޭނުންކޮށްފަ އެވެ.
އެ ދައުވާގައި ދައުލަތުން ވަނީ އެ 10،00 ޑޮލަރު ހޯދުމަށް ވެސް އެދިފަ އެވެ
އެ ކުށުގެ އަސާސީ އަދަބަކީ 10،000 ޑޮލަރާއި އެއް މިލިއަން ޑޮލަރާއި ދެމެދުގެ އަދަދަކުން ޖޫރިމަނާ ކުރުމާއެކު ފަސް އަހަރާއި 15 އަހަރާ ދެމެދުގެ ޖަލު ހުކުމެކެވެ.
