ބޭންކް އޮފް މޯލްޑިވްސް (ބީއެމްއެލް) އިން މާލޭގެ ގެއެއް ނީލަމުގައި ވިއްކާލުމަށް ކުރިން ކަނޑައެޅި އަގަށްވުރެ ދަށް އަގެއްގައި ވިއްކާލުމަށް އިޢުލާނު ކޮށްފިއެވެ.
ބޭންކުން ބުނީ، ވިއްކާލަން ހަމަޖެހިފައިވަނީ ސަންފްރަންޓް ލައިޓްޝޮޕް ގޯޅިތެރޭގައި ހުންނަ މ. ނާއިންފަރުއާގެ ކަމަށެވެ. މި ގެ ވިއްކާލަން ނިންމާފައިވަނީ ބޭންކުން ނަގާފައިވާ ލޯނަކަށް ފައިސާ ނުދައްކައިގެން ކަމަށް ބީއެމްއެލްއިން ހާމަކުރިއެވެ.
ބީއެމްއެލްއިން މަޢުލޫމާތު ދިންގޮތުގައި، މި 792 އަކަފޫޓުގެ ގެ ވިއްކާލުމަށް ނީލަން ފެށޭ އެންމެ ދަށް އަގަކީ 8 މިލިއަން ރުފިޔާއެވެ. މިއީ ކުރިން މި ގެ ވިއްކާލުމަށް ކަނޑައަޅާފައިވާ 10 މިލިއަން ރުފިޔާއަށްވުރެ 2 މިލިއަން ރުފިޔާ ދަށް އަގެކެވެ.
Advertisement
ބޭންކުން ބުނީ، މި ގެ ގަތުމަށް ނީލަން ހުށަހެޅުމުގެ މުއްދަތު ހަމަވާނީ މި މަހުގެ 24 ވަނަ ދުވަހު ކަމަށެެވެ. އަދި ގެ ވިއްކާލެވޭނީ އެންމެ މަތީ އަގު ހުށަހަޅާ ފަރާތަކަށް ކަމަށް ވެސް ބޭންކުން ބުންޏެވެ.
ބީއެމްއެލްއިން އިތުރަށް ބުނީ، އެންމެ މަތީ އަގު ހުށަހެޅި ފަރާތް ކަނޑައަޅާނީ އެ އަގު ބަދަލުނުވެ ފަސް ދުވަހު ދެމިއޮތުމުންކަމަށެވެ. އަދި ނީލަމުގައި އެންމެ މަތީ އަގު އިޢުލާނުކުރާނީ މުއްދަތު ހަމަވާ ދުވަހު، އެ ވަގުތު ހާޒިރުވެ ތިބޭ ފަރާތްތަކުގެ ކުރިމަތީގައި ކަމަށް ވެސް ބޭންކުން ބުންޏެވެ.
އެގޮތުން، ބޭންކުން އަންގާފައިވާ ގޮތުގައި، އެންމެ މަތީ އަގު ހުށަހެޅި ފަރާތުން ކަނޑައެޅިފައިވާ މުއްދަތުގައި ފައިސާ ނުދައްކައިފިނަމަ، އެ ހުށަހެޅުން ބާޠިލުކޮށް، ދެވަނައަށް އެންމެ މަތީ އަގު ހުށަހެޅި ފަރާތަށް ގެ ވިއްކާލުމުގެ ނުވަތަ ނީލަން އަލުން ފެށުމުގެ ޙައްޤު ބޭންކަށް ލިބިގެންވެއެވެ.
މި ގެ ވިއްކާލުމަށް މީގެ ކުރިން ދެ ފަހަރު އިޢުލާނު ކޮށްފައި ވާއިރު، އެ ދެ ފަހަރު ވެސް ނީލަން ފެށޭ އެންމެ ދަށް އަގަކަށް ކަނޑައަޅާފައި ވަނީ 10 މިލިއަން ރުފިޔާއެވެ.
