މާލޭގެ މަގުމަތީގައި އުޅޭ ބުޅާތައް ބަލަހައްޓާ "އޮޅުހިޔާ" ފެސިލިޓީ ހުޅުވިތާ އެންމެ 16 ގަޑިއިރުގެ ތެރޭގައި ބުޅާތައް ކަރަންޓީނު ކުރުމުގެ މަސައްކަތް ފަށައިފި ކަމަށް އެގްރިކަލްޗަރ އެންޑް އެނިމަލް ވެލްފެއަރ މިނިސްޓްރީން މިއަދު ބުނެފިއެވެ.
މިނިސްޓްރީން މިއަދު ކުރި އެކްސް އެއްގައި ބުނީ، އޮޅުހިޔާ ފެސިލިޓީ އާއި ހަވާލުވެވުނު ފަހުން، އެތަނުގެ އައު ކަރަންޓީނު ސަރަޙައްދަށް ބޭނުންވާ ވަސީލަތްތައް ޤާއިމުކޮށް މިހާތަނަށް 15 ބުޅާ އެތަނަށް ގެނެވިފައިވާ ކަމަށެވެ.
މިނިސްޓްރީން ބުނި ގޮތުގައި މިކަން ހާސިލް ކުރެވުނީ އެ މިނިސްޓްރީގެ ޓާސްކް ފޯހުން ހުއްޓުމެއްނެތި ކުރެވުނު މަސައްކަތާއި، ހިތްވަރާއިއެކު އެއްބާރުލުން ދެއްވި (އެންޖީއޯ) ތަކުގެ މިންނެތް މަސައްކަތުގެ ސަބަބުންނެވެ.
މީގެ 86 ދުވަސް ކުރިން، މިނިސްޓްރީން ބުނެފައިވަނީ ބުޅާތަކަށް އަޅާލުމަށް ބޭނުންވާ މިންގަނޑުތައް ކަށަވަރުނުވާތީ އޮޅުހިޔާއަށް ބުޅާތައް ގެންދަން އަދި ތައްޔާރު ނޫން ކަމަށެވެ. އޭރު މިނިސްޓްރީން ފާހަގަކޮށްފައިވާ ކަންބޮޑުވުންތަކުގެ ތެރޭގައި، ފެސިލިޓީގައި މަސައްކަތްކުރާނެ ފަންނީ މީހުން ނެތުމާއި، ކަރަންޓީނު ކުރެވޭނެ ކޮށިތައް ނެތުމާއި، ބަޔޮލޮޖިކަލް ވޭސްޓު ނައްތާލެވޭނެ ނިޒާމެއް ނެތުން ހިމެނެއެވެ.
މިދިޔަ ދެ އަހަރެއްހާ ދުވަހުގެ ތެރޭގައި މިނިސްޓްރީން ފާހަގަކުރި ގިނަ މައްސަލަތައް މިހާރު ހައްލު ކުރެވިފައި ވާއިރު، އޮޅުހިޔާ ފެސިލިޓީގެ ރަސްމީ ހުރިހާ ލިޔެކިއުންތަކާއި ލީގަލް އެސެޓްސް ޓްރާންސްފަރ ގެ މަސައްކަތް ނިމުމަށް ފަހު ވުޒާރާ އާއި ފެސިލިޓީ ރަސްމީކޮށް ހަވާލުކުރީ މިމަހުގެ 26 ވަނަ ދުވަހުގައެވެ.
