ފުލުހުންގެ މުއައްސަސާގައި މަސައްކަތްކުރާ މުވައްޒަފުންގެ ދީނީ ހޭލުންތެރިކަން އިތުރުކުރުމަށާއި ބަރަކާތްތެރި ރަމަޟާން މަހަށް މަރުހަބާކިޔުމުގެ ގޮތުން ދީނީ ދަރުސްއެއް ބާއްވައިފިއެވެ.

އިސްކަންދަރު ބިލްޑިންގައި މިއަދު ބޭއްވި މި ދަރުސްއަކީ ދިވެހި ފުލުހުންގެ ޚިދުމަތާއި، އިސްލާމީ ކަންތައްތަކާ ބެހޭ ވުޒާރާ ގުޅިގެން ބޭއްވި ދަރުސްއެކެވެ.

ފުލުހުން ބުނީ މި ދަރުސްގައި، ކޮމިޝަނަރ އޮފް ޕޮލިސް ޢަލީ ޝުޖާއުއާއި، ޑެޕިއުޓީ ކޮމިޝަނަރ އޮފް ޕޮލިސް އިސްމާއީލް ނަވީންއާއި، އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ ޑރ. މޫސާ އަންވަރު ހަސަންއާއި، މި ޚިދުމަތުގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުންގެ އިތުރުން އެހެނިހެން ފުލުހުންނާއި އާންމު މުވައްޒަފުން ބައިވެރިވެލެއްވި ކަމަށެވެ.

^{ރޯދައަށް ތައްޔާރުވުމަށް ފުލުހުންނަށް ބޭއްވި ދަރުސްގެ ތެރެއިން. / ފޮޓޯ: ފުލުހުން}

މި ދަރުސްދެއްވީ އިސްލާމީ ކަންތައްތަކާ ބެހޭ ވުޒާރާގެ ޑެޕިއުޓީ މިނިސްޓަރ އައްޝައިޚް މުޙައްމަދު އިމްތިޠާއު އައްބާސްއެވެ.

"ބަރަކާތްތެރި ރަމަޟާންމަހަށް ތައްޔާރުވުން'' ނަމުގައި ކުރިއަށް ގެންދިޔަ މި ދަރުސްގައި، ރަމަޟާންމަހުގެ މާތްކަމާއި މި މަހުގެ ޘަވާބާއި ދަރުމަ ހޯދުމަށް މަސައްކަތްކުރުމަށް މައުލޫމާތުދެއްވި ކަމަށް ފުލުހުން ބުންޏެވެ. އަދި އިސްލާމީ ތާރީޚުގެ ޙާދިސާތަކަށް އަލިއަޅުއްވައި މަޢުލޫމާތު ޙިއްސާކުރެއްވި ކަމަށް ފުލުހުން ބުންޏެވެ.

ރަމަޟާންމަހަށް މަރުހަބާކިޔުމުގެ ގޮތުން، ދިވެހި ފުލުހުންގެ ޚިދުމަތާއި އިސްލާމީ ކަންތައްތަކާ ބެހޭ ވުޒާރާ ގުޅިގެން ކޮންމެ އަހަރަކު ވެސް ދީނީ ދަރުސްއެއް ކުރިއަށް ގެންދާކަން ފާހަގަކޮށްލެވެއެވެ.