މާލޭގެ އެކި ސަރަޙައްދުތަކުން މަރުވެފައިވާ އަދި ބަލިވެފައިވާ ކޮތަރުތައް ފެންނަމުންދާކަން ދިރޭތަކެއްޗާއި ބެހޭ މިނިސްޓްރީގެ ސަމާލުކަމަށް އައުމާއި ގުޅިގެން، އެކަމުގެ ސަބަބު ހޯދުމަށް އެ މިނިސްޓްރީން މިއަދު ތަޙުޤީޤެއް ފަށައިފިއެވެ.
ދިރޭތަކެއްޗާއި ބެހޭ ވުޒާރާއިން މިއަދު "އެކްސް" ގައި ކުރި ޕޯސްޓެއްގައި ބުނެފައިވަނީ، މި މައްސަލައިގެ ތަފްސީލު ވީހާވެސް އަވަހަކަށް އާންމުކުރާނެ ކަމަށެވެ. އަދި ވުޒާރާގެ ފަރާތުން ޖުމްހޫރީ މައިދާނަށް ގޮސް، ބައެއް ކޮތަރުތަކުގެ ސާމްޕަލް ނަގައިފައިވާ ކަމަށް ވެސް ވުޒާރާއިން ބުންޏެވެ.
Advertisement
މި ވަގުތު ކޮތަރުތަކަށް ޖެހިފައިވާ ބަލީގެ ބާވަތް ސާފުކޮށް އެނގެން ނެތް ނަމަވެސް، ލަފާކުރެވޭ ގޮތުގައި އެއީ "ޕިޖަން ޕޮކްސް" ކަމަށް ބެލެވެއެވެ. މިއީ ދޫނިތަކުގެ މެދުގައި ފެތުރޭ ބައްޔެއް ކަމަށާއި، އިންސާނުންނަށް މި ބަލި ނުޖެހޭނެ ކަމަށް ވެސް ވުޒާރާއިން ބުންޏެވެ.
ބަލިޖެހިފައިވާ ކޮތަރުތަކުގެ ލޮލާއި ތުންގަނޑު ކައިރިން ހަންގަނޑު ވަރަށް ބޮޑަށް ހަލާކުވެފައިވާކަން ފާހަގަކުރެވިފައި ވެއެވެ. އަދި މި ކޮތަރުތައް ވަރަށް ބޮޑަށް ވަރުބަލިވެފައިވާ އިރު، ކުރިން ކައި އުޅޭހެން ފަރިތަކޮށް ކާން ވެސް އެ އެއްޗިއްސަށް ވަނީ އުނދަގޫވެފައެވެ.
ޖުމްހޫރީ މައިދާނަކީ މާލޭގައި އުޅޭ ކޮތަރުތައް ކާން އެއްވާ މަޝްހޫރު ތަނެކެވެ. ކޮންމެ ދުވަހަކު ވެސް އެތައް ބަޔަކު، ޚާއްޞަކޮށް ކުޑަކުދިން ގޮވައިގެން، ކޮތަރުތަކަށް ކާންދިނުމަށް އެ ސަރަޙައްދަށް ޒިޔާރަތްކުރެއެވެ.
ދިރޭތަކެއްޗާ ބެހޭ ވުޒާރާއިން މި މައްސަލަ ތަޙުޤީޤުކޮށް، އިތުރު މަޢުލޫމާތު ލިބުމުން އާންމުކުރާނެ ކަމަށް ބުނެފައިވެއެވެ. އަދި މި ކަމާއި ގުޅޭގޮތުން އާންމުންގެ ފަރާތުން އެއްވެސް މަޢުލޫމާތެއް ލިބޭނަމަ، އެ ވުޒާރާއަށް އަންގައިދިނުމަށް ވެސް އެދިފައި ވެއެވެ.
